ԱՄՆ պետքարտուղարի տեղակալ Վիլյամս Բըրնսը հայտարարել է, որ Իրանը պատժամիջոցների պատճառով էներգետիկ համակարգում կորցրել է 60 մլրդ դոլարի ներդրումներ: Ընդունված պատժամիջոցները ստիպել են Royal Dutch Shell Plc, France’s Total SA, Italy’s Eni SpA և Norway’s Statoil ASA հայտնի ընկերություններին դադարեցնել իրենց գործունեությունը իսլամական հանրապետության տարածքում: Այս մասին հաղորդում է Iran Focus կայքը: «Տարբեր մոտավոր հաշվարկներով՝ Իրանը, հնարավոր է, կորցնում է 50-60 մլրդ դոլարի պոտենցիալ ներդրումներ էներգետիկայի ոլորտում»,- ասել է Բըրնսը` ելույթ ունենալով Ներկայացուցիչների պալատի արտաքին հարաբերությունների հանձնաժողովի նիստին:
Հիշեցնենք, որ միջուկային ծրագրում ՄԱԿ-ի հետ չհամագործակցելու համար Իրանի նկատմամբ կիրառվել են պատժամիջոցներ, ընդ որում՝ ԱՄՆ-ն, ԵՄ-ն և Ճապոնիան ու Հարավային Կորեան ընդունել են նաև սեփական պատժամիջոցներ:
Երեկ Իրանի նախագահ Մահմուդ Ահմադինեժադը հայտարարել է, որ պատրաստ է բանակցել վեցյակի հետ, որի կազմում են Ռուսաստանը, Չինաստանը, ԱՄՆ-ն, Ֆրանսիան, Մեծ Բրիտանիան և Գերմանիան: Նախատեսվում է, որ այդ հանդիպումը տեղի է ունենալու այս տարվա դեկտեմբերի 6-7-ը շվեյցարական Ժնև քաղաքում: