Իրանի փոխնախագահ Հուսեյն Հազիզադե Հաշեմին հայտարարել է, որ հանում է իր թեկնածությունը նախագահի արտահերթ ընտրության քվեարկությունից: Քվեարկությունն ինչպես հայտնի է տեղի կունենա հունիսի 28-ին: Այն, որ փաստացիի դրա շեմին փոխնախագահ Հաշեմին հանում է իր թեկնածությունը, վկայում է այն մասին, որ Իրանի նախագահի արտահերթ ընտրությանը ծավալվում է ներիշխանական բավականին ակտիվ եւ սուր «ենթագորգային» պայքար: Դրա մասին է վկայում նաեւ այն հայտարարությունը, որ Հաշեմին արել է իր թեկնածությունը հանելիս: Նա ասում է, որ հանում է թեկնածությունը, «որպեսզի պահպանի հեղափոխական ուժերի միասնությունը»:
Հաշեմին նշում է նաեւ, որ թեկնածությունը հանում է Իսլամական Հեղափոխության Խորհրդի խնդրանքով: Ընդ որում, նա մատնացույց է անում նաեւ երեք այլ թեկնածուների, նշելով, թե «հուսով է, որ իր մյուս երեք եղբայրները կօգտվեն միավորվելու եւ հեղափոխությունն ամրացնելու հնարավորությունից»: Նա հույս է հայտնել, որ երկրում կշարունակվի հանգուցյալ նախագահ Էբրահիմ Ռայիսիի կուրսը: Սա բավականին ուշագրավ հայտարարություն է, եթե նկատի առնենք, որ Իրանում ըստ էության պետական կուրսը սահմանում է ոչ թե նախագահը, այլ Գերագույն Հոգեւոր առաջնորդը:
Միեւնույն ժամանակ, Իրանն իհարկե լինելով բավականին խոշոր խաղացող, պետական ռազմավարության հարցում կարող է որդեգրել իհարկե ընթացքի տարբեր մարտավարություններ, որոնց հարցում էլ անշուշտ արդեն կարող է էական նշանակություն ունենալ գործադիր իշխանության կառավարումը, որ իրականացնում է նախագահը: Իրանի փոխնախագահ Հաշեմիի որոշումն ու հայտարարությունները հուշում են, որ Իրանի նախագահի արտահերթ ընտրության քվեարկությանն ընդառաջ կա բավականին թեժ պայքար իրանյան ռազմավարության իրագործման մարտավարական ուղիների հարցում: Մեծ հաշվով, դրա արդյունքին մնացել է սպասելու քիչ ժամանակ, սակայն կասկածից վեր է նաեւ, որ ներիշխանական վերնախավերի պայքարն Իրանում դրանով ամենեւին չի ավարտվելու:
Սա իհարկե Իրանի անկայունության մասին չէ, այլ նույնիսկ հակառակը՝ դիմադրունակության, որն ապահովվում է նաեւ էլիտաների ներքին մրցակցությամբ: Միեւնույն ժամանակ սակայն, այս հանգամանքը հույժ կարեւոր է այն երկրների համար, որոնք Իրանի հետ ունեն բարեկամություն, սերտ հաղորդակցություն եւ աշխատանքային էական անհրաժեշտություններ: Ի դեպ, այդ առումով հատկանշական է, որ Իրանի փոխնախագահի այդ որոշման հայտարարության մասին տեղեկատվությանը զուգահեռ, տեղեկատվություն է տարածվել, որ տեղի է ունեցել հեռախոսազրույց ՌԴ նախագահ Պուտինի եւ Իրանի նախագահի պաշտոնակատար Մոհամմադ Մոհբերի միջեւ, որի ընթացքում Պուտինը հաջողություն է մաղթել առաջիկա նախագահի ընտրության անցկացման հարցում եւ հույս հայտնել, որ դրանից հետո էլ Իրանի ու Ռուսաստանի հարաբերությունը կշարունակվի վերընթաց ճանապարհով: Պուտինն ինչ որ անհանգստությու՞ն է ունեցել այդ ընտրության առնչությամբ: Միաժամանակ, հարկ է նկատել, որ նախօրեին հայտնի է դարձել Ռուսաստանի եւ Իրանի միջեւ գազային ռազմավարական գործակցության հուշագրի ստորագրման մասին: Արդյո՞ք Իրանի վերնախավում ոչ բոլորն են դրանից գոհ:
