«ՀՀ անկախության տարիներին տնտեսական ոլորտում ամենահիմնական ձեռքբերումը ենթակառուցվածքների արդիականացման գործընթացն է. որևէ տնտեսական զարգացում դատապարտված է, եթե խարսխված չէ ժամանակակից տնտեսական ենթակառուցվածքների վրա՝ ջրամատակարարման համակարգ, ճանապարհներ, էներգետիկա, իռիգացիոն համակարգ»,- «Առաջին լրատվականի» հետ զրույցում հայտարարեց «Քրիստոնեա-դեմոկրատական» կուսակցության նախագահ Խոսրով Հարությունյանը:
Ըստ նրա՝ սրանք այն խնդիրներն են, որոնք կազմում են ցանկացած տնտեսության առանցքը, ողնաշարը, որի վրա ավելանում է մնացյալը: Խ.Հարությունյանի կարծիքով՝ կարելի է փաստել, որ վերջին 10 տարիների ընթացքում այս ոլորտում ծավալուն աշխատանքներ են կատարվել, ընդ որում՝ թե՛ պետական բյուջետային հատկացումների, թե՛ վարկային միջոցների, թե՛ Սոցիալական զարգացման հիմնադրամի հաշվին:
Նա նշեց, որ այսօր 1416 դպրոցների 90%-ից ավելին ոչ միայն վերականգնված են և վերանորոգված, այլև ջեռուցվում են. «Համաձայնեք, որ խոսել կրթական պրոցեսի մասին, չունենալով դրա համար տարրական պայմաններ, ավելորդ կլիներ: Այս տարիների ընթացքում մեզ հաջողվեց բեկում մտցնել կրթական համակարգում: Եթե 2000 թ.-ին ձմռան գալուն պես բոլորը սարսափում էին, որ երեխաները ստիպված պետք է գնան արձակուրդ, պարապուրդի մատնվեն, և ընդհատվեր կրթության բնականոն ընթացքը, ապա այսօր դպրոցների ճնշող մեծամասնությունն, ըստ էության, ոչ միայն վերականգնված են, այլև պատրաստ են ձմռանը՝ ջեռուցման առումով»:
Խ.Հարությունյանը նշեց, որ նախկինում 250 համայնքներ խմելու ջուր չունեին, այսօր նման համայնքները կարելի է «մատների վրա հաշվել», և վերջին շրջանում խմելու ջրի, ոռոգման ջրամատակարարման համակարգում կտրուկ փոփոխություններ են տեղի ունեցել, ինչը խոսում է այն մասին, որ այս ոլորտը պատրաստ է լրջագույն քաղաքականության իրականացման պարագայում հաջողություններ ունենալ:
Էներգետիկայի վերաբերյալ կուսակցության ղեկավարը նշեց, որ այսօր ունենք հզոր ռեսուրսներ, այդ թվում՝ վերականգնվող:
«Տնտեսության զարգացման համար ենթակառուցվածքային առումով բարենպաստ, անհրաժեշտ պայմանները կան: Ենթակառուցվածքների արդիականացումը որևէ երկրի տնտեսության զարգացման համար անհրաժեշտ, բայց ոչ բավարար պայման է: Բավարարը՝ արդեն բիզնեսի, գործարարության համար անհրաժեշտ միջավայրի ձևավորումն է, որի ուղղությամբ նույնպես քայլեր կատարվում են»,- ասաց Խ.Հարությունյանը:
