Անկախությունը մեզ տվեց զինանշան, օրհներգ, ՄԱԿ-ին անդամակցություն, սակայն անկախությունն առաջին հերթին արժանապատիվ կեցվածք է: Չի լինում անկախություն առանց արժանապատվության, ընդ որում՝ խոսքը յուրաքանչյուր քաղաքացու արժանապատվության մասին է: Պետության ուշադրության կենտրոնում պետք է լինի իր ամեն մի քաղաքացին: «Առաջին լրատվականի» հետ զրույցում, խոսելով 20-ամյա Հայաստանի ձեռքբերումներից ու անկախության թերացումներից՝ ասաց Հովհաննես Թումանյանի անվան տիկնիկային թատրոնի գեղարվեստական ղեկավար Ռուբեն Բաբայանը:
«Միայն այն դեպքում, երբ ամբողջ համակարգն ուղղված է մարդու համար արժանապատիվ կյանք ապահովելուն, կարող ենք ասել, որ անկախության կերտումը ճիշտ ճանապարհով է ընթանում: Այս պարագայում, կարծում եմ, դեռ շատ բան կա անելու: Մենք չենք կարող ասել, որ հասարակությունն ապրում է արժանապատիվ կյանքով»,- նշեց նա:
Անկախության տարիների ամենամեծ ձեռքբերումը, ըստ Բաբայանի, նոր սերունդն է, որը մեծանում է այլ երկրում` ո՛չ անկախության բեռը, ո՛չ էլ «կուշտ կամ ոչ այդքան կուշտ կյանքի բեռն ուսերին», այլ փորձում է ինքնուրույն իր տեղը գտնել այս աշխարհում:
«Ես այդ սերնդի հետ եմ կապում լավագույն հույսերս` ոչ ի՛մ սերնդի, ոչ էլ ավագ սերնդի», – հավելեց Ռ.Բաբայանը: