Ավստրալիայի մայրաքաղաք Կանբերայում՝ խորհրդարանի շենքի հարևանությամբ, դրվել է հսկայական զուգարանակոնք, որով փորձ է արվում ուշադրություն հրավիրել աշխարհում աղքատության խնդրի վրա` զուգարանակոնքի միջոցով ցույց տալով սանիտարական պայմանների պահպանման և մահացության կանխարգելման անմիջական կապը: Խորհրդարանի պատգամավորները նույնպես միացել են այդ զուգարանից «օգտվելու» երկար հերթին` հիշեցնելու, որ աշխարհում մոտ 2.6 մլրդ մարդ հնարավորություն չունի ապահովելու տարրական սանիտարահիգիենիկ պայմաններ:
«Ձայն արդարության» կազմակերպության կողմից նախաձեռնված այս միջոցառմանը մասնակցել են տարբեր ոլորտները ներկայացնող մարդիկ` ուսուցիչներից մինչև գործադրի ներկայացուցիչներ: Ինչպես ասել է միջոցառման կազմակերպիչներից Ջոն Բեքեթը, եթե սանիտարական պայմանները պահպանվեն, հնարավոր կլինի կանխել տարեկան 8.1 միլիոն երեխաների մահերի մի մասը:
