Թուրքական Zaman թերթի փոխանցմամբ՝ Թուրքիայի փոխվարչապետ Ալի Բաբաջանը բարձրաձայնել է Թուրքիայի առաջիկա հնչեղ պլանների մասին։ Ըստ Բաբաջանի՝ Թուրքիան նպատակադրվել է 2023 թվականին (Թուրքիայի Հանրապետության հիմնադրման 100-ամյակին) տեղ զբաղեցնել տնտեսական պլանում աշխարհի առաջատար երկրների լավագույն տասնյակում։
Նշելով, որ ներկայումս Թուրքիան այդ ցանկում զբաղեցնում է 16-րդ տեղը՝ Բաբաջանը հայտնել է, որ 2008-2009 թվականների գլոբալ տնտեսական ճգնաժամը, որն առաջին հերթին լրջորեն հարվածեց եվրոպական երկրներին, հեշտացրել է Թուրքիայի գործը։ Այդ ճգնաժամը նպաստելու է լավագույն 10 երկրների թվում Թուրքիայի ընդգրկվելուն։
Թուրքական թերթը ներկայացրել է նաև ներկայիս դրությամբ (2010 թվականի տվյալներ) աշխարհի16 ամենախոշոր տնտեսություններն ունեցող երկրների ցանկը. ԱՄՆ՝ 14,657.800 միլիոն դոլար, Չինաստան՝ 10,085.708 միլիոն դոլար, Ճապոնիա՝ 4,309.532 միլիոն դոլար, Հնդկաստան՝ 4,060.392 միլիոն դոլար, Գերմանիա՝ 2,940.434 միլիոն դոլար, Ռուսաստան՝ 2,222.957 միլիոն դոլար, Մեծ Բրիտանիա՝ 2,172.768 միլիոն դոլար, Բրազիլիա՝ 2,172.058 միլիոն դոլար, Ֆրանսիա՝ 2,145.487 միլիոն դոլար, Իտալիա՝ 1,773.547 միլիոն դոլար, Մեքսիկա՝ 1,567.470 միլիոն դոլար, Հարավային Կորեա՝ 1,459.246 միլիոն դոլար, Իսպանիա՝ 1,368.642 միլիոն դոլար, Կանադա՝ 1,330.272 միլիոն դոլար, Ինդոնեզիա՝ 1,029.884 միլիոն դոլար, Թուրքիա՝ 960.511 միլիոն դոլար։
Հիշեցնենք, որ ավելի վաղ Թուրքիայում կարծիքներ էին հնչում, թե 2050 թվականին Թուրքիան կարող է տեղ զբաղեցնել տնտեսական պլանում աշխարհի առաջատար երկրների լավագույն հնգյակում։
