Թուրքական Milliyet թերթի փոխանցմամբ՝ Իսրայելը Հունաստանին «անբարոյական» առաջարկ է արել։ Հունական լրատվամիջոցները գրում են, որ Իսրայելը ցանկանում է օգտվել Էգեյան ծովի հունական կղզիների ավիացիոն բազաներից։ Այսինքն՝ իսրայելական մարտական ինքնաթիռները պետք է հնարավորություն ստանան վայրէջք կատարել Հունաստանի ռազմաօդային ուժերին պատկանող բազաներում։
Հունական Kathimerini ազդեցիկ թերթն իսրայելական այդ առաջարկը որակել է որպես «շատ հեռուն գնացող մի առաջարկ»։ Թերթը գրում է, որ ներկայումս Հունաստանի կառավարությունը դիտարկում է այդ խնդիրը՝ ընդգծելով, որ պաշտոնական Անկարան բավական անհանգստացած է Իսրայելի ու Հունաստանի մերձեցումից։
Հիշեցնենք, որ սեպտեմբերի սկզբին Հունաստանի և Իսրայելի պաշտպանության նախարարներ Պանոս Բեգիլիտիսը և Էհուդ Բարաքը Երուսաղեմում ստորագրել են երկու երկրների ռազմական համագործակցության մասին հուշագիր։ Հուշագրի բովանդակության մասին ոչինչ չի նշվել։