Ադրբեջանական Trend լրատվական գործակալության փոխանցմամբ՝ Ադրբեջանի ԱԳՆ-ն պատասխանել է Հայաստանի արտգործնախարար Էդվարդ Նալբանդյանին, ով հայտարարել է, որ չնայած Ադրբեջանի ապակառուցողական դիրքորոշմանը՝ Հայաստանը շարունակում է ղարաբաղյան հակամարտության կարգավորմանն առնչվող բանակցությունները։
Այս կապակցությամբ Ադրբեջանի ԱԳՆ-ի պաշտոնական ներկայացուցիչ Էլման Աբդուլաևը հայտարարել է. «Իր հայտարարություններով Հայաստանի արտգործնախարար Էդվարդ Նալբանդյանը ոչ միայն «ի ցույց է դնում» ղարաբաղյան հակամարտության կարգավորման վերաբերյալ հայկական կողմի «ապակառուցողական» դիրքորոշումը, այլև «մոլորեցնում է» սեփական քաղաքացիներին ու հանրությանը, ինչպես նաև միջազգային հանրությանը՝ «քողարկելով» հայկական դիվանագիտության «ձախողումը»։
Նալբանդյանը տարրական հարգանք «չի ցուցաբերում» միջազգային իրավունքի սկզբունքների ու նորմերի, ղարաբաղյան հակամարտության կարգավորմանն առնչվող ՄԱԿ-ի ու ԵԱՀԿ բանաձևերի նկատմամբ։ Նալբանդյանի ուշադրությունը պետք է հրավիրել նաև ԵԱՀԿ Մինսկի խմբի համանախագահող երկրների ղեկավարների այն հայտարարության վրա, որ ներկայիս ստատուս քվոն անընդունելի է»։
