Զրուցելով Լարի Քինգի հետ՝ Պուտինն անդրադարձել է նաև իրանական խնդրին: «Իրանը միշտ պատրաստակամություն է հայտնել համագործակցելու ՄԱԳԱՏԵ-ի և միջազգային հանրության հետ»,- ասել է նա: «Սակայն առաջին փուլում կան հարցեր, և մենք աջակցում ենք ՄԱԳԱՏԵ-ին դրանց վերջնական պատասխաններն ստանալու գործում»: «Դուք չեք կարող չիմանալ, որ մենք մտահոգված ենք մասսայական ոչնչացման զենքի նույնիսկ տեսական տարածման հարցերով: դա վերաբերում է բոլոր երկրներին, նաև Իրանին: Միևնույն ժամանակ մենք հիմքեր չունենք կարծելու, որ Իրանը ձգտում է միջուկային զենք ունենալ»,- նշել է վարչապետը: Նա նաև խոսել է այդ հարցի կարգավորման մասին` նշելով, որ Ռուսաստանը համագործակցում է բոլոր շահագրգիռ կողմերի հետ: «Հույս ունեմ, որ կարգավորում կլինի: Կարծում եմ՝ դրանում շահագրգռված են ոչ միայն Իրանի հարևանները, Իսրայելը, որը լրջորեն մտահոգված է իրանական միջուկային ծրագրերից, այս գործընթացի մյուս մասնակիցները, այլև հենց ինքը՝ Իրանը, և իրանական ժողովուրդը»,- ասել է Պուտինը:
Լարի Քինգի հարցին, թե՝ ինչո՞ւ եք այդպես թաքցնում ձեր դուստրերին, Պուտինը պատասխանել է. «…մենք բազմաթիվ խնդիրներ ունենք ահաբեկչության հետ կապված և ուղղակի պարտավոր ենք մտածել մեր ընտանիքների անվտանգության մասին, այդ թվում և հատկապես՝ դուստրերիս: Նրանք նորմալ, սովորական կյանքով են ապրում, սովորում են համալսարանում: Գոհ են, ունեն ընկերներ, ամեն ինչ նորմալ է: Բայց նրանց հարապարակային բեմ հանելը ճիշտ չեմ համարում, իրենք չեն էլ ցանկանում»:
