Ռոբերտ Քոչարյանը գիրք է հրատարակել: Դա անեկդոտ չէ, այլ իրականություն, որի մասին հայտնել է նրա ոչ պաշտոնական կայքը: Քոչարյանի հրապարակած գրքում նրա ելույթներն ու հարցազրույցներն են: Առայժմ հայտնի չէ՝ արդյո՞ք այնտեղ են քոչարյանական մտքի այնպիսի գոհարներ, ինչպիսիք են, ասենք, «մոսկան» կամ «կլիզման» և քոչարյանական քաղաքական տերմինաբանության այլ մարգարիտներ:
Ռոբերտ Քոչարյանը երևի որոշել է նվեր անել Հայաստանի անկախության քսանամյակի առիթով, թեև Հայաստանին նրա լավագույն նվերն, իհարկե, կարող էր լինել պարզապես լռությունը: Բայց Քոչարյանը վերջին շրջանում սկսել է հակառակն անել` հնարավորինս շատ խոսել, կամ ինքն անձամբ, կամ անուղղակիորեն, այսպես ասած՝ իր ոչ պաշտոնական աղբյուրներով: Կասկած չկա, որ Ռոբերտ Քոչարյանի ակտիվությունը նախընտրական տրամադրություններով է պայմանավորված, որ կամաց-կամաց գերիշխող են դառնում Հայաստանում: Ինչպես երևում է, Ռոբերտ Քոչարյանը ամենևին մտադիր չէ բաց թողնել ներկայիս ընտրական գործընթացները, և եթե անձամբ չմասնակցի դրանց, ապա հաստատ փորձելու է քաղաքական տարբեր սեգմենտների միջոցով անմիջականորեն ներգրավված լինել դրանցում և առաջ մղել սեփական քաղաքական շահերը: Սա վկայում է այն մասին, որ Հայաստանի առաջիկա ընտրական փուլն իսկապես կարևոր է լինելու երկրի համար, և դրանում արձանագրվելու են իրապես շրջադարձային պրոցեսներ: Հենց այդ նկատառումներն են Ռոբերտ Քոչարյանին մղում այդպես հետևողականորեն պաշտպանել սեփական շահերը և ոչ մի կերպ բաց չթողնել ընտրական գործընթացները: Քոչարյանը թերևս հասկանում է, որ այդ ընթացքում կարող են լինել այնպիսի զարգացումներ, որ հետո արդեն այլևս հնարավոր չլինի հետ բերել կորցրածը:
Այսպիսով, Ռոբերտ Քոչարյանի տարատեսակ նախաձեռնությունները դառնում են Հայաստանում սպասվող ներքաղաքական լրջագույն փոփոխությունների ևս մեկ՝ բավական գործուն ինդիկատորներից մեկը: Մյուս կողմից, թող տարօրինակ չհնչի, սակայն Ռոբերտ Քոչարյանի գործոնի ակտիվությունը, եթե, իհարկե, այն ակտիվանում է այսպես ասած՝ գործնականում, կարող է իր էֆեկտն ունենալ ներքաղաքական զարգացումների վրա՝ հանդիսանալով ներքաղաքական կարևոր խթանիչ: Այդ պնդումը կարող է զարմացնել շատերին, ովքեր Քոչարյանին համարում են Հայաստանի ներկայիս, մեղմ ասած, անմխիթար վիճակի գլխավոր պատասխանատուներից մեկը։ Սակայն անգամ իր գործոնի ամբողջ դեստրուկտիվությամբ, համենայն դեպս՝ մինչ այժմ, հատկապես նախագահության շրջանում եղած արդյունքից դատելով, այդուհանդերձ, ներքաղաքական գործընթացում այդ գործոնի առարկայական` ոչ մտացածին և քարոզչական առկայությունը զգաստացնող նշանակություն կունենա քաղաքական դաշտի մյուս սուբյեկտների՝ թե՛ ընդդիմադիր ուժերի, թե՛ Սերժ Սարգսյանի համար:
