Այսօր Երևանում տեղի ունեցավ ««SAP»-ի մուտքը Հայաստան» բիզնես ֆորումը, որին մասնակցում էին փոխնախարար Վահե Դանիելյանը, «SAP»-ի ԱՊՀ երկրների գլխավոր տնօրեն Վլադիսլավ Մարտինովը, « SAP»-ի հայաստանյան գործընկեր «Շիրակ տեխնոլոգիաներ» ընկերության ներկայացուցիչները, Հայաստանի բանկերի ասոցիացիայի ու արդյունաբերողների միության նախագահները և այլ ներկայացուցիչներ Հայաստանի տնտեսության տարբեր ոլորտներից: «SAP» ընկերությունը գործում է աշխարհի 120 երկրներում, և ավելի քան 20 արդյունաբերական ոլորտներում աշխատող մոտ 100 հազար ընկերություններ կիրառում են «SAP»-ի ծրագրային լուծումները: «Մենք այսօր աշխարհում ծրագրային լուծումներ առաջարկող առաջատար ընկերությունն ենք: Մեր լուծումները բարձրացնում են ինչպես մասնավոր, այնպես էլ պետական հատվածում գործող ընկերությունների էֆեկտիվությունը: Մեր ընկերության տարեկան եկամուտը գերազանցում է 10 միլիարդ եվրոն: Ամեն տարի ներդրում ենք ավելի քան 1 միլիարդ եվրո մեր ընկերության կատարելագործման համար` ինչպես տեխնոլոգիաների, այնպես էլ մեթոլոգիայի առումով: Գլոբալ շուկայում մեր զբաղեցրած ծավալը 2 անգամ մեծ է մեր հիմնական մրցակցից»,- իր խոսքում նշեց «SAP»-ի ԱՊՀ երկրների գլխավոր տնօրեն Վլադիսլավ Մարտինովը:
