Ադրբեջանական Salam News գործակալության փոխանցմամբ՝ TÜRKSAM միջազգային հարաբերությունների ու ռազմավարական հետազոտությունների կենտրոնի նախագահ, Իգդիրից թուրքական խորհրդարան անցած Սինան Օղանն անդրադարձել է Թուրքիայի տարածքում ՆԱՏՕ-ի ռադիոտեղորոշիչ կայանի (ՌՏԿ) տեղակայման խնդրին.
«Հակահրթիռային պաշտպանության (ՀՀՊ) համակարգը տեղակայվելու է Մալաթիայում։ Կառավարությունը ցանկանում է ստեղծել Իսրայելի հետ հարաբերությունների վատթարացման տեսիլք, սակայն դա չի համապատասխանում նրա գործունեությանը։ ՀՀՊ համակարգն ի ցույց է դնում Իսրայելի հետ լարվածության քաղաքականության կեղծ լինելը։
Աշխարհագրությանը տեղյակ մարդիկ գիտեն, որ այդ համակարգի տեղակայման նպատակն Իսրայելին պաշտպանելն է, քանի որ Իրանից արձակված հրթիռն ի վիճակի չէ հասնել Եվրոպա։ Աշխարհագրական տեսանկյունից Մալաթիան ամենահարմար կետն է Իսրայելի և Իրանի միջև։ ՀՀՊ-ն ոչ թե պաշտպանական միջոց է, այլ ընդհակառակը՝ հարձակման միջոց։ Այն կարող է Թուրքիայի և Իրանի միջև պատերազմի պատճառ դառնալ։
Թուրքիան ուր որ է՝ կընկնի ծուղակը։ Շատ մեծ հավանականություն կա, որ Իրանի հետ հարաբերություններում լարվածություն առաջանա։ Դրա համար գոյություն ունի երկու պատճառ. ա) Թունիսի իրադարձությունները վաղ թե ուշ տեղի են ունենալու Իրանում, սակայն Սիրիայի ևւ Լիբիայի օրինակները ցույց են տալիս, որ Թուրքիան ԱՄՆ-ի հետ համատեղ է գործում։
բ) Իրանի կողմից հարձակման վտանգ է ստեղծվում։ Իսրայելը յուրաքանչյուր պահի կարող է դիվերսիա իրականացնել՝ Իրանի կողմից հարձակման արհեստական սպառնալիք ստեղծելով։ ԱՄՆ-ի նպատակը Թուրքիային և Սիրիային միմյանց բախելն է։ Դժբախտաբար, Թուրքիան գտնվում է այդ թակարդն ընկնելու նախաշեմին»։
Հիշեցնենք, որ ՆԱՏՕ-ի ՌՏԿ-ն տեղակայվելու է Թուրքիայի Մալաթիայի նահանգի Քյուրեջիք վայրում, որը գտնվում է թուրք-իրանական սահմանից 540 կիլոմետր հեռավորության վրա։
