Հայաստանի բռնցքամարտի ֆեդերացիան Ադրբեջանի իշխանությունների կողմից Բաքվում սեպտեմբերի 22-ից հոկտեմբերի 10-ն անցկացվող աշխարհի առաջնությանը մասնակցելու կապակցությամբ անվտանգության երաշխիքներ է ստացել: Այս մասին panarmenian.net-ին տված հարցազրույցում ասել է Հայաստանի ազգային հավաքականի մարզիչ Ռաֆայել Մեհրաբյանը, ով նշել է, որ տղաները լավ մարզավիճակում են և կանեն ամեն ինչ հաջող ելույթ ունենալու համար:
Հայ բռնցքամարտիկները կմեկնեն Բաքու սեպտեմբերի 21-ին: Ինչպես նշում է vestnikkavkaza.net-ը, սա բացառիկ դեպքերից է, երբ հայ մարզիկները մեկնում են Ադրբեջան, քանի որ երկու երկրների միջև թշնամական հարաբերություններ են՝ Լեռնային Ղարաբաղի չլուծված հակամարտության պատճառով:
Մեհրաբյանը նշել է, որ աշխարհի առաջնությանը կմասնակցեն քաշային տարբեր կարգի բռնցքամարտիկներ Հովհաննես Բոչկովը (56կգ), Վլադիմիր Սարուխանյանը (60կգ), Հրաչիկ Ջավախյանը (64կգ), Սամվել Մաթևոսյանը (մինչև 69կգ), Անդրանիկ Հակոբյանը (75կգ), Արթուր Խաչատրյանը (81կգ) և Արմեն Սիմոնյանը (91կգ):
Աշխարհի առաջնության ժամանակ լավագույն 8 արդյունքները ներկայացրած մարզիկները կնվաճեն 2012թ. Օլիմպիական խաղերի ուղեգրեր:
