Եվրոպան ձմռան հենց առաջին օրերից կանգնել է շատ լուրջ խնդիրների առաջ: Գրեթե ամենուր տեղացած ձյունը մի քանի անգամ գերազանցել է ամսական բոլոր նորմաները: Փակ են Մեծ Բրիտանիայի, Շվեյցարիայի, Լեհաստանի, Գերմանիայի և մի շարք այլ երկրների օդանավակայաններ: Փակ են մի քանի հազար ուսումնական հաստատություններ, ինչի արդյունքում աշակերտները ստացել են լրացուցիչ արձակուրդի հնարավորություն: Լեհաստանում արդեն իսկ ցրտից մահացել է 8 մարդ, ընդհանուր առմամբ ամբողջ Եվրոպայում` 15 մարդ: Օդերևութաբանները նշում են, որ Եվրոպային սպասում է մեկ այլ արհավիրք: Միջերկրական ծովում առաջած ցիկլոնը անձրևներ է խոստանում Եվրոպայի հարավային մասում: Մասնագետներն ասում են, որ այդ ցիկլոնը հավանաբար ջրհեղեղներ կառաջացնի Եվրոպայի այդ մասում, հատկապես Բալկաններում:
Իրավիճակը բավականին լուրջ է Ռուսաստանում: Երեկ ցրտի նոր ռեկորդներ են սահմանվել Ռուսաստանի եվրոպական մասում: Օրինակ՝ Մոսկվայում ջերմաստիճանն իջել է մինչև 23,6 աստիճան` մի փոքր ցած մնալով 1931 թ. ռեկորդին, երբ ջերմաստիճանն իջել էր մինչև 24,1 աստիճան:
