Թուրքական Zaman թերթի փոխանցմամբ՝ թուրք պետնախարար, ԵՄ-ին Թուրքիայի անդամակցության գծով գլխավոր բանագնաց Էգեմեն Բաղըշը Ուկրաինայի Յալթա քաղաքում մասնակցել է ԵՄ-ին մերձենալու նպատակով կազմակերպված «Ուկրաինան և աշխարհը. ընդհանուր սպառնալիքներ, ընդհանուր ապագա» խորագրով 8-րդ կոնֆերանսին։
Կոնֆերանսին մասնակցել են նաև ԵԽԽՎ թուրք նախագահ Մևլյութ Չավուշօղլուն, ԵՄ ընդլայնման և եվրոպական հարևանության հարցերով եվրակոմիսար Շտեֆան Ֆյուլեն, Մեծ Բրիտանիայի նախկին վարչապետ Թոնի Բլերը, Լեհաստանի նախկին նախագահ Ալեքսանդր Կվասնևսկին, Շվեդիայի արտգործնախարար Կառլ Բիլդտը, ինչպես նաև Իսրայելի նախագահ Շիմոն Պերեսը։
Երբ վերջինս սկսել է ելույթ ունենալ կոնֆերանսում, Էգեմեն Բաղըշը ցուցադրաբար լքել է կոնֆերանսի դահլիճը։ Ապա Բաղըշն իր արարքի մասին ասել է. «Ես չէի կարող ձևացնել, թե ամեն ինչ նորմալ է, և լսել մեր 9 եղբայրներին սպանած երկրի ներկայացուցչին։ Սա առավելագույն քաղաքակիրթ պատասխանն էր դրա համար ներողություն խնդրել չցանկացողին։ Յուրաքանչյուր հարթակում մեր արձագանքը լինելու է այսպիսին»։
Հիշեցնենք, որ 2009 թվականի Դավոսի համաժողովում էլ նույն Պերեսի ելույթի ժամանակ Թուրքիայի վարչապետ Էրդողանն էր ցուցադրաբար լքել դահլիճը։
