«Չեմ կարծում, որ այս շրջանում որևէ լուրջ բան տեղի կունենա, եթե, իհարկե, համանախագահող երկրները չորոշեն բանակցային գործընթացի օրակարգում փոփոխություններ ներմուծել և դրանց հիման վրա նոր առաջարկներով հանդես գալ»,- «Առաջին լրատվական»-ի հետ զրույցում խոսելով ԼՂ հարցի կարգավորման գործընթացի ներկայիս վիճակի մասին՝ կարծիք հայտնեց ԼՂՀ նախկին արտգործնախարար Արման Մելիքյանը:
Տեղեկացնենք, որ Մոսկվայում տեղի ունեցած մամլո ասուլիսում Ռուսաստանի ԱԳՆ պաշտոնական ներկայացուցիչ Ալեքսանդր Լուկաշևիչը հայտարարել է, որ ԵԱՀԿ Մինսկի խմբի համանախագահների հերթական հանդիպումը տեղի է ունենալու սեպտեմբերի երկրորդ տասնօրյակին Նյու Յորքում ՄԱԿ-ի Գլխավոր ասամբլեայի շրջանակներում։
Նշենք նաև, որ վերջին շրջանում ԼՂ հարցի կարգավորման գործընթացի պասսիվությունը փորձագետները կապում են մասնակից երկրներում կատարվող քաղաքական գործընթացների` մասնավորապես սպասվելիք ընտրական պրոցեսների հետ: Արման Մելիքյանը ևս նկատեց, որ այժմ ճիշտ ժամանակը չէ նոր առաջարկություններով հանդես գալու համար: Ըստ նրա՝ ներկայիս քաղաքական կոնյունկտուրան ենթադրում է, և նախընտրելի է, որ այդ նորամուծությունները շրջանառության մեջ դրվեն հաջորդ տարի:
«Բայց, իհարկե, որևէ բան այս հարցում հստակ կանխորոշել հնարավոր չէ: Բոլոր դեպքերում, կարծում եմ, որ համանախագահող երկրները կշարունակեն միմյանց հետ շփումները, և կարծում եմ, որ թեև այսօր հասունացել է օրակարգում փոփոխություններ կատարելու պահը, սակայն այդ գործընթացը պահանջում է մանրակրկիտ, բազմակողմանի և սթափ աշխատանք»,- մանրամասնեց Մելիքյանը:
