Ազգային անվտանգության խորհրդի քարտուղար Արթուր Բաղդասարյանը Արագածոտնի մարզի Ոսկեվազ գյուղում մոտ մեկ ամսից շահագործման կհանձնի իրեն պատկանող կոնյակի գործարանը, որի շինարարությունը սկսել է մոտավորապես 2 տարի առաջ:
Նախնական համաձայնությամբ` ընկերությունը անվանվելու է «Հայաստի Գրուպ»: Արթուր Բաղդասարյանը այդ գործարանի հետ մեծ հույսեր է կապում և իր արտադրությամբ մտադիր է մրցակցել ԲՀԿ առաջնորդ Գագիկ Ծառուկյանի հետ: ԱԽՔ-ը ի սկզբանե խոստովանել է, որ ֆրանսիական «Պեռնո Ռիկարին» իրեն մրցակից չի համարում, որովհետև նրա հետ չի կարող մրցակցել: Ինչ վերաբերում է Գագիկ Ծառուկյանի «Արարատ» կոնյակի-գինու-օղու գործարանին` նշել է, որ պատրաստ է մտնել մրցակցության մեջ: Այդ հարցում նրան գումարով աջակցել է Ուկրաինայի հայազգի գործարար Նվեր Մխիթարյանը: Ըստ մեր հավաստի աղբյուրների` հայազգի գործարարին կոնյակի գործարան ստեղծելու գաղափարն ու «դաբրոն» տվել է Արթուր Բաղդասարյանը, իսկ ամբողջ ներդրումը` որպես փոխհատուցում, կատարել է Նվեր Մխիթարյանը: Ինչ վերաբերում է շահույթին, ապա այն հավասարապես կիսվելու է:
Հարկ է նկատել, որ մեր աղբյուրների փոխանցմամբ, Արթուր Բաղդասարյանը անձնական ներդրումների հարցում չափազանց ժլատ է, սակայն կլորիկ գումարների առկայությամբ պատրաստակամորեն ներդնում է իր միտքը, կապերը և հնարավորությունները` ինչպես այս դեպքում: Ի դեպ, բիզնեսի առումով սա Արթուր Բաղդասարյանի և Նվեր Մխիթարյանի առաջին համագործակցությունը չէ: Նրանք Ոսկեվազում նաև մրգի վերամշակման գործարան ունեն: Այդ դեպքում ևս նախաձեռնող կողմը Արթուր Բաղդասարյանն էր, իսկ ներդրողը՝ գործարար Նվեր Մխիթարյանը:
Ինչևէ, թեև մեր աղբյուրները և Ոսկեվազում ապրող բնակիչները հավատացնում են, որ կառուցվող կոնյակի գործարանը պատկանում է Արթուր Բաղդասարյանին, իսկ գումար ներդնողը Նվեր Մխիթարյանն է, սակայն Արթուր Բաղդասարյանը իր շրջապատում հայտարարում է, որ ինքը Նվեր Մխիթարյանին միայն առաջարկել է Հայաստանում ներդրումներ կատարել և աջակցել է այդ հարցում: Ի դեպ, Բաղդասարյանը շատ սերտ հարաբերությունների ունի հանրահայտ գործարարի հետ, ով իր հիմնական գործունեությունը ծավալում է Ուկրաինայում: Ըստ մեզ հասած տեղեկությունների` ընտրությունների նախաշեմին Մխիթարյանը հսկայական գումարներ է հատկացնում ՕԵԿ-ի ընտրարշավը կազմակերպելու համար: Այս ընտրություններին ևս խոստացել է հսկայական գումարներ տալ ՕԵԿ-ի գետնին հավասարված անունը մի քանի սանտիմետր բարձրացնելու համար: Ասենք, որ մեծահարուստ գործարար Նվեր Մխիթարյանը Ուկրաինայի ամենահայտնի հայերից է, նաև Ռադայի նախկին պատգամավոր է: Նա զբաղվում է շինարարական բիզնեսով և մայրաքաղաքի կենտրոնում էլիտար ու շքեղ բազմաթիվ շենքերի հեղինակ է: Մասնագիտությամբ ինժեներ-շինարար-տեխնոլոգ է:
Ոսկեվազի և հարակից գյուղերի բնակիչները թեև ոգևորված են, որ իրենց համար նոր աշխատատեղեր կբացվեն, բայց միաժամանակ լուրջ մտավախություններ ունեն, որ իրենց որպես էժան աշխատուժ են օգտագործելու: Շատերին այսօր նաև հետաքրքրում է այն հարցը, թե ինչո՞ւ է Արթուր Բաղդասարյանը որոշել կոնյակի գործարան հիմնել ոչ թե մայրաքաղաքում, այլ մարզում: Շրջանառվող խոսակցությունների համաձայն` պատճառներից մեկն այն է, որ Արագածոտնի մարզում խաղողի բերքատվությունը` թե՛ քանակապես, թե՛ որակապես շատ բարձր է: Դա նշանակում է, որ թե՛ մթերման գործընթացը կհեշտանա, թե՛ ծախսերը կկրճատվեն: Երկրորդ` որ գյուղի բնակիչներին կարելի է որպես էժան աշխատուժ օգտագործել գերշահույթ ապահովելու նպատակով, իսկ շրջակա գյուղերի բնակիչները այլընտրանք չունենալով` ստիպված կաշխատեն տվյալ կոնյակի գործարանում:
Այս և այլ հարցերի շուրջ զրուցեցինք Ոսկեվազի գյուղապետ Հայկ Հովհաննիսյանի հետ, որը ՕԵԿ կուսակցության անդամ է և 17 տարի զբաղեցնում է գյուղապետի աթոռը: Նա նշեց, որ կոնյակի գործարանը շահագործման կհանձնվի ամենաշուտը մեկ ամսից: Սակայն միանշանակ չկարողացավ ասել, թե գործարանի բացմամբ քանի աշխատատեղ կստեղծվի: «Չեմ կարող ասել, թե քանի աշխատատեղ կապահովվի, բայց թվում է` 500-700 աշխատատեղ կբացվի: Կոնյակի գործարանի բացումը հիանալի է` ոչ միայն մեր, այլ տարածքաշրջանի համար: Մոտավորապես 15-20 գյուղ աշխատանքով կապահովվեն», – նշեց գյուղապետը: Նա արձագանքելով այն հարցին, թե հնարավո՞ր է, որ գյուղի բնակիչներին որպես էժան աշխատուժ շահագործեն կոնյակի արտադրամասում, ասաց. «Ես ձեզ մի բան ասեմ` հանրապետության ամենաբարձր աշխատավարձն է լինելու: Այդպիսի բան հնարավոր չէ: Ես ասում եմ, որտեղ միջին կա, այստեղ ավելի բարձր է լինելու»: Երբ Հայկ Հովհաննիսյանից հետաքրքրվեցինք, թե ճի՞շտ են այն խոսակցությունները, որ կոնյակի գործարանը Արթուր Բաղդասարյանինն է, պատասխանեց, որ ոչ ոք իրեն «դալաժիտ» չի անում, թե ումն է: «Բայց ներդրող ունենք` Նվեր Մխիթարյանը` Կիևից: Ես գիտեմ, որ ամբողջ ֆինանսավորումը նրա կողմից է կատարվում», – սահմանափակվեց գյուղապետը:
