Ինչպես արդեն տեղեկացրել էր «Առաջին լրատվականը», Իրանի ազգային անվտանգության խորհրդի քարտուղար Սայիդ Ջալիլին օրեր առաջ մի նամակ էր հղել ԵՄ արտաքին քաղաքականության ղեկավար Քեթրին Էշթոնին, որում հայտարարել էր բանակցությունների սեղանի շուրջ վերադառնալու Իրանի համաձայնության մասին:
Associated Press գործակալության հաղորդմամբ՝ ՄԱԳԱՏԵ-ում ԱՄՆ դեսպան Գլեն Դեյվիսը, անդրադառնալով Իրանի կողմից ԵՄ-ին հղած նամակին, հայտարարել է. «Իրանի իշխանությունները փորձում են այդ նամակի միջոցով միջազգային հանրության կարծիքը փոխել իրենց օգտին ու հավելյալ ժամանակ ձեռք բերել, և դա այն պայմաններում, երբ իրանը մինչ այժմ խախտել է իր բոլոր միջազգային պարտավորությունները»։
Associated Press-ի մատուցմամբ՝ Իրանի վերջին նամակը բավական մեղմ ոճով է պատրաստվել, և ենթադրվում է, որ Իրանը պատրաստ է մինչ այժմ տաբու եղած խնդիրների շուրջ բանակցել միջազգային հանրության հետ: Գործակալության մատուցմամբ՝ ըստ երևույթին, Իրանը պատրաստվում է, Արևմուտքի պահանջներին տեղի տալով, ժամանակավորապես դադարեցնել ուրանի հարստացման գործընթացը: