Ուկրաինայի նախկին նախագահ Լեոնիդ Կուչման, ով ներգրավված է «Украинская правда» թերթի նախկին գլխավոր խմբագիր Գեորգի Գոնգաձեի սպանության գործի դատաքննությա մեջ, հայտարարել է, որ սպանության պատվիրատուները ինչ-որ հատուկ ծառայություններն են: «Интерфакс-Украина»-ին տված հարցազրույցում նա ասել է, որ լրագրողի սպանությունը «Ուկրաինան թուլացնելու խաղի մաս է կազմել»:
Կուչմայի խոսքերով՝ Ուկրաինան 90-ականներին առանձնապես ոչինչ չէր ներկայացնում իրենից, ինչի համար իրենց «ոչ ոք առանձնապես ձեռք չէր տալիս», սակայն տնտեսական և քաղաքական հետագա վերելքի հետ մեկտեղ՝ «երկրի հետ սկսեցին այլ կերպ վարվել»:
«Առաջին հարվածը հասցվել է 11 տարի առաջ` Գոնգաձեի սպանությամբ: Այսօր պետք է պարզ լինի, որ ծրագրավորված նման քայլերը կարող էին կատարվել միայն անվտանգության ծառայությունների կողմից»,- հայտարարել է Ուկրաինայի նախկին նախագահը: Նա չի մեկնաբանել, թե որ երկրի հատուկ ծառայություններին նկատի ունի, սակայն նշել է, որ դրանք կարող են լինել ինչպես ներքին, այնպես էլ արտաքին ուժեր:
Հիշեցնենք, որ «Украинская правда» թերթի նախկին գլխավոր խմբագիր Գեորգի Գոնգաձեին 2000 թ. առևանգել և սպանել էին: Հետագայում պարզվել էր, որ Լեոնիդ Կուչման անձնական հեռախոսազրույցներում հիշատակել է լրագրողին և նշել, որ նրան պետք է չեզոքացնել: Քննությունը պարզել է, որ Գոնգաձեին առևանգել են Ուկրաինայի ոստիկանության աշխատակիցները, որոնցից մեկն էլ սպանել է լրագրողին:
