Դեկտեմբերի 1-ին, ծովի մակերևույթից 2200-2600 մետր բարձրության վրա գործարկվեց «Լեռ-էքս» ՍՊԸ-ի Հանքասարի պղնձամոլիբդենային հանքավայրի կենտրոնական տեղամասը: Հանքավայրը հայտնաբերվել է ՀՍՍՀ երկրաբանության վարչության կողմից` 1950-ական թվականներին: 2004-07թթ այստեղ երկրաբանահետախուզական աշխատանքներ են կատարվել «Լեռ-էքս»-ի պատվերով, ու պարզվել է, որ բացի մոլիբդենից ու պղնձից, այստեղ կա նաև ռենիում: Համալիրի արտադրական հզորությունը տարեկան կկազմի 150 հազ տ հանքաքար: Միաժամանակ իրականացվում է հանքաքարի վերամշակման հարստացուցիչ ֆաբրիկայի կառուցումը` համապատասխան թափուկատարով ու մաքրված ջրի հետադարձ օգտագործման եղանակի կիրառմամբ: Առաջիկա տարիներին նախատեսվում է ձեռնարկության արտադրական հզորությունը հասցնել 450 հազ տ-ի: Հանքավայրում այսօր աշխատում է 300 մարդ, բայց նախատեսված է այդ թիվը հասցնել 500-ի: «Այս հանքավայրի շահագործումը առաջին հերթին լուրջ ռազմավարական նշանակություն ունի, քանի որ այն ընդամենը 2 կմ է հեռու Ադրբեջանից` Նախիջեւանից: Բացի դրանից, համալիրի շահագործմամբ կբացվեն նոր աշխատատեղեր, ինչը կնպաստի Կապանում գործազրկության մակարդակի իջեցմանը», – ասաց «Լեռ-էքս»-ի խորհրդի նախագահ, Սյունիքի մարզպետ Սուրիկ Խաչատրյանը: Վերջինս պատասխանելով լրագրողների հարցերին` ոչ հաստատեց, ոչ էլ հերքեց, որ հանքավայրը իրեն է պատկանում: «Եթե լուրջ, ապա այժմ հանքը բանկերից մեկինն է, վարկային ծրագրով ենք գործը սկսել: Բայց ուրիշ ով, եթե ոչ Սուրիկ Խաչատրյանը կկարողանար նախաձեռնել այս գործը: Դժվար էր, թեկուզ մարզում 3 լեռնհանքային կոմբինատ է աշխատում, բայց դրանք խորհրդային ժամանակներից են գործում»,-ասաց մարզպետը` ավելացնելով, որ տարիներ հետո ըստ ներդրումների պարզ կլինեն հանքավայրի սեփականատերերը: Արտադրանքը, տնօրեն Արմեն Բակունցի խոսքով կիրացվի հայաստանյան և արտասահմանյան կազմակերպությունների կողմից, արդեն նախնական պայմանավորվածություններ կան: Ձեռնարկությունը կհամագործակցի մարզի մյուս հանքարդյունաբերական ձեռնարկությունների հետ. Զանգեզուրի պղնձամոլեբդինային կոմբինատի պղնձաձուլարանի ստեղծման դեպքում, հանքաքարը կուղարկվի Քաջարան: Հանքասարի պղնձամոլիբդենային հանքավայրում արդյունավետ աշխատանքի համար«Լեռ-Էքս»-ի ոսկե հուշամեդալ, ինչպես նաեւ` մարզպետի շնորհակալագրով եւ դրամական պարգեւներ ստացան «Լեռ-էքս» ՍՊԸ-ի աշխատակիցները: Հանքավայրի շահագործմանը զուգահեռ «Լեռ-էքս» ՍՊԸ-ն թույլտվություն է ստացել շարունակելու երկրաբանահետախուզական աշխատանքները: Ստացված նախնական տվյալները թույլ են տալիս ձեռնարկության պատասխանատուներին ասելու, որ առաջիկա մի քանի տարում կավելանա հանքաքարի հանույթն ու վերամշակումը: «Նորաբաց համալիրը հնարավորություն ունի դառնալու հանրապետության խոշորագույն ձեռնարկություններից մեկը»,- ասաց ընկերության գլխավոր խորհրդատու, երկրաբան Ռոլանդ Ղոնյանը:
