Եվրոպական խորհրդարանի նախագահ Եժի Բուզեկը կարծում է, որ «Արևելյան գործընկերության» հիմնական նպատակներն են` տնտեսական համագործակցությունը, ժողովրդավարության զարգացումը և վիզային ռեժիմի ազատականացումը: Այս մասին հաղորդում է ուկրաինական УНИАН գործակալությունը: Բուզեկն այս հայտարարություններն արել է այսօր Ստրասբուրգում Եվրոնեսթի բացման արարողությանը (մասնակցում են Եվրոպական խորհրդարանի, «Արևելյան գործընկերության» ծրագրի անդամ երկրների խորհրդարանների անդամները.- 1in.am):
Բուզեկն ասել է, որ այսօր բոլորը խոսում են Աֆրիկայում և Մերձավոր Արևելքում տեղի ունեցող իրադարձությունների մասին, քանի որ դա «մոդայիկ է», սակայն «արևելյան հարևանությունը նույնպես կարևոր է Եվրոպայի համար»: Բուզեկը հատուկ ուշադրություն է դարձրել ժողովրդավարության խնդիրների լուծմանը. «Երկարատև կայունություն, առանց ժողովրդավարության, առանց օրենքի գերակայության, չի լինում»,- ասել է Բուզեկը:
Ինչ վերաբերում է սահմանների բացմանը, ապա այդ առումով նա ասել է, որ պետք է ինտեգրվեն ժողովուրդները, այլ ոչ թե կառավարությունները: «Այդ պատճառով վիզային ռեժիմի ազատականացումը շատ կարևոր է մեզ հաամր»,- ասել է Բուզեկը: