Իսրայելական Cursor Info-ն, վկայակոչելով Walla պորտալը, հայտնում է, որ ԱՄՆ-ը և ՆԱՏՕ-ն Էրդողանից պահանջել են հանգիստ թողնել Իսրայելին։
Վաշինգտոնյան աղբյուրները հայտնում են, որ Թուրքիայի վարչապետ Էրդողանի հակաիսրայելական ռազմաշունչ հայտարարությունները նախ հարուցել են ԱՄՆ-ի զարմանքը, ապա խիստ քննադատության են արժանացել նրա կողմից։
Այն բանից հետո, երբ Էրդողանը հայտարարել է, թե պատրաստ է Իսրայելը ռմբակոծելու համար ուղարկել F-16 ինքնաթիռներ, Վաշինգտոնից Անկարա հաղորդագրություն է եկել, որում Էրդողանին խորհուրդ է տրվել «անհապաղ հանգստանալ»։ Դրան զուգահետ Թուրքիայի զինված ուժերի գլխավոր շտաբը նմանատիպ ուղերձներ է ստացել ՆԱՏՕ-ից։
Ի դեպ, երեկ տեղի է ունեցել Իսրայելի ռազմա-քաղաքական կաբինետի (ութնյակի) նիստը, որում վճռվել է անտեսել Էրդողանի ռազմաշունչ հայտարարությունները։
Հիշեցնենք, որ Էրդողանը հայտարարել է, թե իրենք պատրաստ են Իսրայելի հետ վատթարագույն սցենարին՝ պատերազմին։