ԱՄՆ-ն չունի այնպիսի զենք, որը «կախարդական փայտիկ» կդառնա Ուկրաինայի համար Ռուսաստանի դեմ հակամարտությունում։ Կիև կատարած այցի ժամանակ նման հայտարարություն է արել Պենտագոնի ղեկավար Լլոյդ Օսթինը։
«Նման ռազմական հակամարտությունում չկա զենք, որը կարող է կախարդական փայտիկ լինել։ Ամեն ինչ իրականում կախված է ճիշտ հնարավորություններ տրամադրելուց, ինչպես նաև այդ հնարավորություններն իմաստալից կերպով ինտեգրելուց, որպեսզի մարտի դաշտում ճիշտ ազդեցություն գործեք», – ասել է Օսթինը մամուլի ասուլիսի ժամանակ, որը հրապարակել է ԱՄՆ պաշտպանության նախարարությունը։
Պենտագոնի ղեկավարն ընդգծել է, որ ԱՄՆ-ն կշարունակի աջակցել Ուկրաինային Ռուսաստանի դեմ հակամարտության ընթացքում։
ԱՄՆ պաշտպանության նախարարությունը նոյեմբերի 20-ին նաև հայտարարել է Կիևին անվտանգության լրացուցիչ աջակցության մասին, որը «պետք է բավարարի Ուկրաինայի անվտանգության և պաշտպանության կարիքները»։
«Փաթեթը ներառում է հակաօդային պաշտպանության լրացուցիչ հնարավորություններ, հրետանային զինամթերք, հակատանկային զենքեր և այլ սարքավորումներ՝ օգնելու Ուկրաինային պաշտպանել իր ինքնիշխան տարածքը և պայքարել իր ազատության համար Ռուսաստանի կողմից շարունակվող պատերազմում», – նշված է հայտարարությունում։
