ՀՀ տրանսպորտի և կապի նախարար Մանուկ Վարդանյանը դեկտեմբերի 1-ին ընդունել է «Լեհաստանի արժեթղթերի արտադրության ձեռնարկություն» ընկերության նախագահ Քշիշտոֆ Զարնոտալի գլխավորած պատվիրակությանը: Մ.Վարդանյանը, ողջունելով լեհական ընկերության ներկայացուցիչներին, առաջարկել է ընդլայնել տրանսպորտի և կապի ոլորտում համագործակցության շրջանակը և այդ ուղղությամբ ներկայացնել կոնկրետ առաջարկություններ:
Ք.Զարնոտալինը հայտնել է, որ «Լեհաստանի արժեթղթերի արտադրության ձեռնարկություն» ընկերությունը աշխարհի մի շարք երկրներում, այդ թվում՝ Հայաստանում, հետաքրքված է տախոգրաֆների կամ հսկիչ սարքերի նոր համակարգի ներդրմամբ: Ք.Զարնոտալինը մանրամասն ներկայացրել է ընկերության գործունեության ոլորտները և նշել, որ այն զբաղվում է տախոգրաֆների, ավտոմեքենաների տեխնիկական զննության կտրոնների, վարորդական իրավունքի վկայականների, արժեթղթերի արտադրությամբ, որոնք արտահանվում են աշխարհի ավելի քան 30 երկրներ:
«Լեհաստանի արժեթղթերի արտադրության ձեռնարկություն» ընկերության նախագահը հայտնել է, որ իրենք հետաքրքրված են Հայաստանում տարբեր ծրագրերի իրականացմամբ:
Հանդիպման վերջում պայմանավորվածություն է ձեռք բերվել առաջիկայում ՀՀ տրանսպորտի և կապի նախարարությանը ներկայացնել համագործակցության վերաբերյալ առաջարկների փաթեթ: