Թեղուտում շինարարությունը շարունակվում է առանց խոչընդոտների, և բնապահպանական կառույցների գործունեությունը որևէ կերպ չի անդրադարձել կառավարության ու «Էյ Սի Փի» ՓԲԸ-ի գործունեության վրա (զբաղվում է Լոռու մարզի Թեղուտի պղնձամոլիբդենային հանքավայրի շահագործմամբ): Վերջիններս գուցե միայն ուժեղացել են իրենց PR-ը: «Առաջին լրատվական»-ի հետ զրույցում այսպիսի կարծիք հայտնեց «Թրանսփերենսի Ինթերնեյշնլ» հակակոռուպցիոն կենտրոնի նախագահ Սոնա Այվազյանը` «Ի՞նչ արդյունք են տվել «Թեղուտ» փակ բաժնետիրական ընկերության գործունեության և Թեղուտի անտառների ոչնչացման դեմ պայքարող հասարակական կազմակերպությունների ջանքերը» հարցին ի պատասխան:
Մեզ հետ զրույցում նա տեղեկացրեց, որ «Էկոդար» բնապահպանական հասարակական կազմակերպությունը մի քանի օր առաջ դիմում է հղել Օրհուսի կոնվենցիայի համապատասխան կոմիտե այն կապակցությամբ, որ Վճռաբեկ դատարանը վարույթ չի ընդունել «Էկոդար» ՀԿ-ի դիմումը Թեղուտի հանքի շահագործման վերաբերյալ` պնդելով, թե կազմակերպությունը իրավունք չունի վիճարկել այնպիսի գործողություններ, որոնք չեն խախտել իր իրավունքը: Կազմակերպությունը պահանջում է արձանագրել Հայաստանի կողմից Օրհուսի կոնվենցիայի խախտումները:
