Ադրբեջանի արտաքին գործերի նախարարության մամուլի ծառայության ղեկավար, մամուլի քարտուղար Այհան Հաջիզադեն մեղադրել է Հայաստանում Իրանի դեսպան Մեհդի Սուբհանիին՝ նրա հայտարարությունները որակելով կողմնակալ։
«Մենք խստորեն դատապարտում ենք սադրիչ բնույթի անհիմն մտքերը, որոնք արտահայտվել են Հայաստանի Հանրապետությունում Իրանի Իսլամական Հանրապետության դեսպան Մեհդի Սուբհանիի կողմից հայկական հարթակին տված հարցազրույցի ժամանակ։
Այս հայտարարությունները, որոնք խաթարում են Ադրբեջանի և Իրանի հարաբերությունները՝ հիմնված միմյանց տարածքային ամբողջականության և ինքնիշխանության նկատմամբ փոխադարձ հարգանքի վրա, միևնույն ժամանակ հակասում են նոյեմբերի 9-ին Տաշքենդում երկու երկրների նախագահների հանդիպման ժամանակ Իրանի նախագահի արած հայտարարություններին։։ Այսպես, այս հանդիպման ժամանակ Իրանի Իսլամական Հանրապետության նախագահ Էբրահիմ Ռայիսին ուրախությամբ նշել է, որ Ադրբեջանը երկար տարիներ անց ապահովել է իր տարածքային ամբողջականությունը, Ղարաբաղը կրկին վերամիավորվել է Ադրբեջանին։
Մեր տարածքային ամբողջականության և ինքնիշխանության դեմ ուղղված Իրանի դեսպանի հայտարարությունները, որոնք արվել են Ադրբեջանի և Իրանի երկկողմ հարաբերությունների զարգացման դրական դինամիկայի ֆոնին, մենք սադրանք ենք համարում։ Ակնկալում ենք, որ Իրանը համապատասխան քայլեր կձեռնարկի՝ ի պատասխան դեսպանի արած հայտարարությունների և կանխելու այնպիսի քայլեր, որոնք չեն համապատասխանում մեր հարաբերությունների ոգուն»,- ասված է հայտարարությունում։
