Երեկ թուրքական Radikal թերթը գրել է, որ WikiLeaks կայքում տեղադրված փաստաթղթերից մեկի համաձայն՝ թուրքական մի քանի ընկերություններ զբաղվել են Իրան զենքի արտահանմամբ:
Այսօրինակ գործունեությամբ զբաղվել են «Dış Ticaret ve Mühendislik», «Limited Kolorkim Kimya» և «Mercan Tanıtım» ընկերությունները, որոնք ավելի հայտնի են քիմիական արտադրության ոլորտում: Ըստ հրապարակված փաստաթղթի՝ այս ընկերությունները Իրանին են վաճառել զենք, պայթուցիկ նյութեր, ռումբեր, պլաստիկ պայթուցիկներ:
Ընկերություններից մեկում հայտարարել են, որ այդ ամենը չի համապատասխանում իրականությանը, և որ փաստաթղթում նշված փաստերն «ապշեցուցիչ են ու ծիծաղելի», և որ դա իրենց չի անհանգստացնում:
Kolorkim Kimya ընկերությունում ասել են նաև, որ իրենք համագործակցել են իրանական կողմի հետ, բայց այդ համագործակցությունն ավարտվել է 2007 թ., այլ ոչ թե 2009 թ., ինչպես նշված է փաստաթղթում: Ընկերության ներկայացուցիչ Թունջեր Շահինը հայտնել է, որ իրենք տեղյակ են եղել, որ իրանցիներին վաճառած նիտրատ թաղանթանյութը (ցելյուլոզա), որն օգտագործվում է տպագրության մեջ կիրառվող ներկեր պատրաստելիս, կարելի է նաև կիրառել պայթուցիկների արտադրության ժամանակ: Ընկերությունում նաև հայտնել են, որ իրենք այդ նյութը ներկրում են Չինաստանից և Բրազիլիայից:
