Թուրքիայի Ստամբուլ քաղաքում ընթացող հունահռոմեական ոճի ըմբշամարտի աշխարհի առաջնությունը չափազանց անհաջող ստացվեց Հայաստանի հավաքականի համար:
Հայաստանը ներկայացնող 7 քաշային կարգերում հանդես եկող ըմբիշներից 6-ն արդեն ոչ միայն մեդալներ չեն նվաճել, այլև տեղ չեն զբաղեցրել ուժեղագույն 5-յակում, ինչը կապահովեր 2012 թ. Լոնդոնում կայանալիք օլիմպիական խաղերի ուղեգիր:
Լավագույն 5-յակում տեղ զբաղեցնելու իրական հնարավորություն ուներ 120 կգ քաշային կարգում հանդես եկող Յուրի Պատրիկեևը, ով չնայած 1/8 եզրափակիչում պարտվեց այդ քաշային կարգում հավասարը չունեցող կուբացի Միջային Նունյես Լոպեսին, սակայն բրոնզե մեդալ նվաճելու հնարավորություն ստացավ. կուբացին դուրս եկավ եզրափակիչ: Այդուհանդերձ, Պատրիկեևը չօգտվեց իր հնարավորությունից և առաջին իսկ մենամարտում պարտվելով շվեդ Յոհան Եուրենին` տեղ չզբաղեցրեց անգամ լավագույն 5-յակում:
Հիշեցնենք, որ մինչ այդ տարբեր փուլերում պայքարից դուրս էին մնացել նաև Ռոման Ամոյանը (55 կգ), Արման Ադիկյանը (66 կգ.), Արթուր Ալեքսանյանը (96 կգ), Վահան Ջուհուրյանը (60 կգ) և Արթուր Շահինյանը (84 կգ):
Փաստորեն, Հայաստանի հավաքականի միակ հույսը մնում է 74 կգ քաշային կարգում հանդես եկող Արսեն Ջուլֆալակյանը, ումից արդեն ամբողջ հայ ազգն է մեդալ պահանջում: Ջուլֆալակյանը պայքարի մեջ կմտնի վաղը: 1/32 եզրափակիչում հայ ըմբիշը կմրցի իտալացի Սավերիո Սկարամուզիի հետ: