64-րդ միջազգային ավտոսալոնը (IAA) բացվում է երեքշաբթի օրը գերմանական Ֆրանկֆուրտ քաղաքում: Մոտակա երկու օրերին այն բաց է լինելու միայն լրագրողների համար, իսկ սեպտեմբերի 15-25-ը այնտեղ կարող են այցելել բոլոր ցանկացողները: Ամենաշատ սպասված մեքենաներից են նոր սերնդի Porsche 911, Mazda CX-5, ինչպես նաև վերածնված Audi A2-ը:
Ավտոսալոնի պաշտոնական անունն է The International Motor Show (IAA): Այն տեղի է ունենում երկու տարին մեկ՝ Փարիզի ավտոսալոնի հետ ռոտացիոն համակարգով: Այս տարի Ֆրանկֆուրտում կցուցադրվեն մեծ քանակությամբ սերիական մեքենաներ, որոնք աշնանից կհանվեն վաճառքի: Մուտքի տոմսի գինը կախված է օրվա ժամից և տատանվում է 8-15 եվրոյի շրջանակներում:
IAA համարվում է ավտոշուկայի ամենակարևոր ավտոսալոններից մեկը: Նախանցյալ տարի ցուցահանդեսին մասնակցում էր 781 ընկերություն, որոնք ցուցադրել են ավելի քան 200 համաշխարհային շնորհանդեսներ: Այն այցելել էր 850 հազար մարդ, իսկ այս տարի պլանավորվում է, որ այդ թիվը կհասնի 900 հազարի:
Audi-ին կցուցադրի միանգամից երկու մոդել` նոր սերնդի Audi A6 Allroad-ը, ինչպես նաև A2 մոդելը, որը կունենա նաև էլեկտրական տարբերակ: Ակնկալվում է, որ ինգոլշտադցիների նոր էլեկտրոմեքենան մրցակցելու է BMW i3- հետ: Որպեսզի այն արդարացնի իր բարձր գինը, ակնկալվում է, որ մեքենան լինելու է հագեցած, այդ թվում՝ նաև տեխնիկական առումով:
Porsche-ն ցուցահանդեսում ներկայացնելու է 911-ի նոր սերնդի ավտոմեքենա: Այն իր նախորդներից մի քիչ երկար է, որոշ տվյալներով՝ այն հիմա ունի էլեկտրաուժեղացուցիչով ղեկ և մեխանիկական ժամանակակից փոխանցման տուփ:
