Թուրքական Anadolu գործակալության փոխանցմամբ՝ Բոսնիայում գործող Հումանիստների միջազգային լիգան Թուրքիայի արտգործնախարար Ահմեդ Դավութօղլուին շնորհել է «21–րդ դարի առաջնորդ» մրցանակը։ Այդ կազմակերպության գլխավոր քարտուղար Զդրավկո Շուրլանը հայտարարել է, որ Դավութօղլուն այդ մրցանակին արժանացել է Բոսնիայում ու Հերցեգովինայում և ընդհանրապես Բալկաններում երկխոսություն սկելու ու խաղաղություն հաստատելու հարցերում ունեցած ներդրման համար.
«Թուրքիան և Դավութօղլուն շատ բան են արել Բոսնիայի ու Հերցեգովինայի համար։ Հարավսլավիայի փլուզումից հետո Դավութօղլուն կարևոր դեր է խաղացել բալկանյան երկրների մերձեցման հարցում։ Նրա երկխոսելու մշակույթը մեծապես օգնել է այդ գործընթացին»։
Հիշեցնենք, որ Հումանիստների միջազգային լիգան ստեղծվել է 1974 թվականին Սարաևոյում։ Ներկայումս այն գլխավորում է Խորվաթիայի նախկին նախագահ Ստեփան Մեսիչը։
Ինչ վերաբերում է Բալկաններում Թուրքիայի արտգործնախարարի խաղաղասիրական ներդրմանը, ապա պետք է հիշել, որ Դավութօղլուն 2009 թվականի աշնանը բոսնիական և սերբական կողմերի միջև միջնորդական առաքելության շրջանակներում առանձնազրույց էր ունեցել Բոսնիայի նախագահ Հարիս Միլաջիչի հետ։
Զրույցի ժամանակ Բոսնիայի ծխել սիրող նախագահը վառում է գլանակը, և զարմանալիորեն նույնն է անում ընդհանրապես չծխող, մոլեռանդ մուսուլման Դավութօղլուն, որը, սակայն, այս անգամ բացառություն է անում։ Արդյունքում՝ զրույցը դրական ելք է ունենում, և Դավութօղլուին հաջողվում է կատարել միջնորդի իր առաքելությունը։
Դրանից հետո եվրոպական դիվանագիտական շրջանակներում, ուր Դավութօղլուին անվանում են բոլորի հետ լեզու գտնել կարողացող մարդ, սկսվեց շրջանառվել «ծխել՝ ինչպես Դավութօղլուն» արտահայտությունը:
