«Առաջին լրատվականին» դիվանագիտական աղբյուրներից հայտնի է դարձել, որ Աստանայում ԵԱՀԿ գագաթնաժողովի շրջանակներում ակնկալվող Սարգսյան-Ալիև հանդիպումը հազիվ թե տեղի ունենա:
Հիշեցենք, որ հոկտեմբերի վերջին Աստրախանում Սերժ Սարգսյանի և Իլհամ Ալիևի հետ հանդիպումից հետո ուշագրավ պահը թերևս այն էր, որ Ռուսաստանի նախագահը հույս է հայտնել, որ դեկտեմբերի սկզբին կայանալիք ԵԱՀԿ գագաթնաժողովից առաջ Հայաստանն ու Ադրբեջանը կարող են հանգել Ղարաբաղյան հակամարտության կարգավորման սկզբունքների համաձայնեցված լուծման: «Այսօրվա հանդիպումը գնահատում եմ շատ օգտակար: Բոլոր դեպքերում, բանակցություններն ավելի լավ են, քան հակամարտությունը: Բայց սրանք ոչ միայն բանակցություններ են, այլև առաջ ընթանալու հնարավորություն»,- ասել էր Մեդվեդևն ու հավելել. «Այսօր մենք պայմանավորվել ենք, որ այժմ մնացել են կարգավորման սկզբունքները, որոնք հետագայում պետք է դրվեն խաղաղ պայմանագրի հիմքում: Հարցեր դեռ շատ կան, բայց կողմերի մոտ կա ցանկություն: Մենք որոշակի ուղի ենք անցել, որը հույս է տալիս կարծելու, որ եթե կողմերը լավ աշխատեն,- իսկ նման հանձնարարություն մենք մեր արտգործնախարարներին տվել ենք,- հնարավոր է դեկտեմբերի 1-2-ը Աստանայում կայանալիք ԵԱՀԿ գագաթնաժողովի ժամանակ հասնել հիմնարար սկզբունքների համաձայնեցմանը: Բայց, կրկնում եմ, հիմնական աշխատանքները դեռ առջևում են»: