Թուրքիայի սահմաններից 16 կմ հեռավորության վրա գտնվող Հայաստանի Մեծամորի ատոմակայանի հետ կապված միջոցներ ձեռնարկելու պահանջով կոչ է արվել Թուրքիայի Ազգային մեծ ժողովի նիստում։ Թուրքիայի խորհրդարանն ընդգծում է, որ ատոմակայանը, իր շահագործման ժամկետի ավարտի պատճառով «վտանգ է ներկայացնում ողջ տարածաշրջանի համար»։ Այս մասին տեղեկացնում է Անադոլու գործակալությունը։
Նշվում է, որ Թուրքիայի խորհրդարանի խնդրագրերի հանձնաժողովը, որը վերլուծում է քաղաքացիներից խորհրդարան ներկայացված միջնորդություններն ու բողոքները, ատոմակայաններից բխող վտանգների դեմ միջոցներ ձեռնարկելու իբր խնդրանք է ստացել։
Թուրքիայի արտաքին գործերի նախարարության պատասխանում նշվում է, որ Մեծամորի ատոմակայանը գտնվում է Ատոմային էներգիայի միջազգային գործակալության (ՄԱԳԱՏԷ) վերահսկողության ներքո։ Ընդգծվում է, որ «ՄԱԳԱՏԷ-ն և Եվրամիությունը որոշել են, որ կայանի անվտանգության կարգավիճակը չի համապատասխանում ժամանակակից տեխնիկական չափանիշներին»։
Թուրքիայի ԱԳՆ-ն ընդգծում է. «Ատոմակայանի փակումը Հայաստանի բացառիկ պատասխանատվությունն է։ Ատոմակայանը կառուցվել է մեր սահմանին շատ մոտ և հին տեխնոլոգիայով շահագործվող օբյեկտ է։ Կայանը ռիսկի գործոն է ողջ տարածաշրջանի համար։ Այդ ռիսկերի մասին մեր երկիրը խոսում է ինչպես ԱԷՄԳ-ի գլխավոր համաժողովներում, այնպես էլ միջազգային հանրությանը անհրաժեշտ կոչ անելիս։ Մեր տարածաշրջանը և աշխարհը չեն կարող իրենց թույլ տալ երկրորդ Չեռնոբիլ. Մեծամորի ատոմակայանը պետք է փակվի։ Այս առումով այս խնդիրը կշարունակի մնալ մեր երկրի ուշադրության ներքո»։
Նշվում է, որ Թուրքիան դիմել է Ատոմային էներգիայի միջազգային գործակալությանը` նախկին ԽՍՀՄ-ի ժամանակներում կառուցված ատոմակայանի շահագործումը դադարեցնելու խնդրանքով։
