Հայաստանի պաշտպանության նախարարությունը հայտնում է, որ Հայաստանի ԶՈՒ-ն ունի մեկ զոհ և երկու վիրավոր՝ դիրքեր սնունդ տեղափոխող մեքենայի ուղղությամբ ադրբեջանական կրակոցների հետևանքով: Ըստ հաղորդագրության, Ադրբեջանը թիրախավորել է նաև շտապօգնության մեքենան: Բաքվի այդ կրակոցները փաստորեն հաջորդել են սեպտեմբերի 30-ին տարածած ապատեղեկատվությանը, թե իբրև հայկական զինուժի կրակոցների հետևանքով զոհվել է ադրբեջանցի զինծառայող: Հայաստանի ՊՆ հերքել էր դա և նշել, որ հայկական զինուժի կրակոցների մասին ադրբեջանական տեղեկությունը կեղծ է: Սակայն, ինչպես ավելի վաղ նկատել էի, ադրբեջանական այդ տեղեկությունները ընդամենը քող են, այսպես ասած հող են նոր սադրանքների համար, ինչին էլ դժբախտաբար լինում ենք ականատես հոկտեմբերի 2-ին: Իսկ դա տեղի է ունենում հոկտեմբերի 5-ին Գրանադայում սպասվող հնգակողմ հանդիպումից առաջ, որտեղ օրակարգում լինելու է Հայաստանի և Ադրբեջանի միջև այսպես ասած խաղաղության պայմանագիրը: Բաքուն դրանից առաջ գնում է սահմանային սրացման, անկասկած ունենալով այդ կերպ Հայաստանիվրա քաղաքական և հոգեբանական ճնշում գործադրելու նպատակ: Սակայն, ոչ միայն Հայաստանի վրա, այլ թերևս նաև այսպես ասած եվրոպացի միջնորդների, մասնավորապես Գրանադայում սպասվող հանդիպման եռյակի՝ Միշելի, Մակրոնի և Շոլցի վրա:
Հայաստանի և Ադրբեջանի սահմանին մոնիտորինգ է իրականացնում ԵՄ դիտորդական առաքելությունը: Կա մտայնություն, թե այդ առաքելության առկայությունն է, որ Բաքվին թույլ չի տալիս գրոհել Հայաստանի սահմանը, ինչպես նախորդ տարի սեպտեմբերին Ջերմուկում: Սակայն, ԵՄ առաքելության առկայությունը չի խանգարել Ադրբեջանին գնալ սահմանային ավելի փոքր սադրանքների և լարումներին: Կասկածից վեր է, ԵՄ առաքելությունը, որն առավել ևս Ադրբեջանին տեղեկացնում է իր դիտարկման ուղղությունների մասին, Բաքվի համար ռազմական ավելի մասշտաբային գործողության խոչընդոտ չէ: Պարզապես, Բաքուն դեռևս գտնվում է մասշտաբային սադրանքի քաղաքական հող նախապատրաստելու գործընթացում և կասկած չկա, որ Գրանադայի հանդիպումը օգտագործելու է այդ նկատառումով: Այդ համատեքստում էլ սահմանին լարման իմիտացիա ստեղծող գործողություններով փորձում է պայման թելադրել նաև միջնորդներին, տողատակում թերևս դնելով բավականին շոշափելի հաղորդագրությունը՝ կամ ԵՄ դերակատարները կգործեն ընդհանուր առմամբ ադրբեջանական նարատիվներին համահունչ, կամ Ադրբեջանը դիմելով նոր ագրեսիայի պարզապես կհեղինակազրկի նաև ԵՄ մոնիտորինգային առաքելությանը, վստահ լիելով, որ դրան չի հետևելու որևէ պատժամիջոց Բաքվի դեմ, որը Եվրոպայի համար ներկայումս էներգետիկ շոշափելի մատակարարներից մեկն է, առավել ևս հերթական ձմեռնամուտի պարագայում:
