Ես ճիշտն ասած, չեմ հասկանում, թե ինչով է պայմանավորված Հայաստանի կողմից այդ «թշնամական վերաբերմունքը», որի մասին բարձրաձայնում է Մոսկվան. Եթե հարցը վերաբերում Ռուսաստանի նախագահին, որն ունի խնդիրներ Հաագայի քրեական դատարանում, դա մեզ չի վերաբերում, դա ՌԴ-ի ներքին գործն է: Այս մասին «Առաջին լրատվական»-ի հետ զրույցում նշեց քաղաքագետ Լիլիթ Դալլաքյանը՝ անդրադառնալով նրան, որ Հայաստանը մտադիր է վավերացնել Հռոմի ստատուտը, իսկ ՌԴ ԱԳՆ-ն արդեն հայտարարել է, որ դա Հայաստանի կողմից «թշնամական քայլ է»:
«Որևէ հակառուսական կետ այնտեղ չկա: Իսկ եթե խնդիրն այն է, որ Ալիևին կարող է պատասխանատվության ենթարկել, և Ռուսաստանը դրանի նեղվում է, դժգոհ է, դա առավելևս մեզ չի վերաբերում: Այսինքն չարժի շեղվել Ռուսաստանի գնահատկանների վրա: Այլ բան, որ Ռուսաստանն անընդհատ փորձում է այստեղ ապակայունացնել իրավիճակը: Իսկ Ռուբեն Վարդանյանի, Լևոն Մնացականյանի, Արշավիր Ղարամյանի ձերբակալությունները Մոսկվան փորձում է օգտագործել և ասել՝ Հայաստանն իր հերոսներին հանձնել է, տեսեք ինչ է կատարվում: Այսինքն ուշադրությունը շեղում են, բայց լավ է, որ մեր կառավարությունն ասաց, որ քայլեր կձեռնարկի այդ անձանց հետ կապված: Հետո փորձելու են օգտագործել ընդդիմությանը՝ փողոցային անկարգություններ հրահրելու համար, բայց մենք տեսնում ենք, որ չեն հաջողում, որովհետև մեր ժողովուրդը շատ լավ հասկանում է, թե ինչ է կատարվում»,-ասաց նա:
