Ես շատ կուզենայի, որ Գրանադայում ստորագրվեր փաստաթուղթ, որը հենված է նախկինում բանակցող կողմերի կողմից ընդհանուըր հայտարարի եկած կետերի վրա: Այս մասին «Առաջին լրատվական»-ի հետ զրույցում նշեց «Հանրապետություն» կուսակցության ղեկավար Արամ Զ. Սարգսյանը:
«Դա կամրագրեր, որ նախկինում ձեռք բերված պայմանավորվածությունները ուժի մեջ են և այդ պայմանավորվածություններին որպես երաշխավոր ԵՄ-ն, Ֆրանսիան և Գերմանիան, որպես երաշխավոր կամրագրեին: Դա լուրջ փոփոխություն կբերեր հետագա խաղաղության փաստաթղթի վերջնական ստորագրման առումով: Այդ փաստաթուղթն ունի հիմնականում երեք կետ. Առաջին կետը տարածքային ամբողջականության ճանաչումն է՝ 1991-ի Ալմաթիի համաձայնագրով, որին համաձայնել են և Նիկոլ Փաշինյանը, և Իլհամ Ալիևը: Երկրորդը սահմանազատման գործընթացն է, որը պետք է տեղի ունենա 1975 թվականի քարտեզներով և որին պետք է մասնակցի միջազգային հանրությունը՝ խորհրդատվական իրավունքով: Այս առումով էլ համաձայնություն կա: Եվ երրորդը վերաբերում է ճանապարհների ապաշրջափակմանը միջազգային օրենքներով և բոլոր ուղղություններով: Սա ևս դրական է, որովհետև միջազգային օրենքների պարագայում որևէ ուղեկցում չի կարող լինել, ցանկացած երկրում այդ ճանապարհները բացվելու են և այդ ուղղությունները սպասարկելու են տվյալ երկրների համապատասխան անվտանգային ծառայությունները: Այդ փաստաթուղթը մեզ դուրս կհանի նոյեմբերի 9-ի փաստաթղթից և այդ չարաբաստիկ 9-րդ կետը որպես այդպիսին, այլևս շահառու չի ունենա»,-ասաց նա:
