Ռուսաստանից ամեն ինչ էլ կարելի է սպասել, տարբեր բնույթի գործողություններ՝ սկսած գազի մատակարարման ընդհատումներից, Լարսի ճանապարհի խոչընդոտներից մինչև ընդհուպ ԳՌՈՒ ագենտների ներգրավմամբ տարբեր գործողություններ, այդ թվում նաև ահաբեկչական: Այս մասին «Առաջին լրատվական»-ի հետ զրույցում նշեց Հելսինկյան քաղաքացիական ասամբլեայի Վանաձորի գրասենյակի ղեկավար Արթուր Սաքունցը՝ անդրադառնալով նրան, թե ի՞նչ կարելի է սպասել Ռուսաստանից, որի ԱԳՆ-ն «խիստ թշնամական» է որակել Հռոմի ստատուտը վավերացնելու գործընթացը Հայաստանում:
«Այն, ինչ տեղի ունեցավ Ստեփանակերտում, որտեղ պայթեց բենզինի ցիստերռը, դա, ըստ էության, ահաբեկչական ակտ էր: Նման գործողություններ կարող են լինել նաև Կրեմլի կողմից: Ինչ վերաբերում է Հռոմի ստատուտին, շատերի մոտ կա մոլորություն, որ այն մի փրկության փաստաթուղթ է և ամեն ինչ պետք է փրկի: Իրականում դա դիրքորոշման վկայություն է: Փաստ է, որ Հռոմի ստատուտը վավերացրած բոլոր պետություններին Ռուսաստանը թշնամի չի համարում: Այսինքն խնդիրը ոչ թե ստատուտը վավերացնելով ազգային անվտանգության խնդիրների լուծման հնարավորության մեջ է, այլ դա քաղաքական, եթե կուզեք՝ աշխարհաքաղաքական դիրքորոշում է, որ Հայաստանն այլևս բոլոր այն գործողությունները, որոնք կարող են որակվել պատերազմական հանցագործություններ, մարդկության դեմ ուղղված հանցավոր գործողություններ, ինքը մասնակցում է դրանց իրավական գնահատականին որպես պետություն և պատրաստակամ է աջակցել Միջզգային քրեական դատարանի կողմից կայացված որոշումներին կամ քննություններին»,-ասաց Սաքունցը:
