«Սկսել ա»-ն նշանակում է, որ եթե իշխանությունը խելքը գլուխը չհավաքի, ուրեմն քշելու ենք, պրծնենք»,- «Առաջին լրատվական»-ի հետ զրույցում անդրադառնալով ՀԱԿ-ի հայտարարած «սկսել ա՛» կարգախոսին՝ կարծիք հայտնեց Հայ ազգային կոնգրեսի անդամ, Քրիստոնեա-ժողովրդական վերածնունդ կուսակցության նախագահ Սոս Գիմիշյանը:
Նա նշեց, որ այսուհետ սկսվելու է մի պրոցես, որի նպատակն է հասնել ներկա իշխանությունների հիմնովին հեռացմանը: Գիմիշյանը նկատեց, որ ՀԱԿ-ի միշտ ասել է և հիմա էլ կողմ է, որ այդ գործընթացն իրականանա սահմանադրական ճանապարհով. «Սահմանադրական ճանապարհը ենթադրում է գործողություններ` սկսած խաղաղ պիկետներից, հանրահավաքներից, վերջացրած ապստամբությունով և հեղափոխությունով»:
ՀԱԿ անդամը նկատեց, որ այսօր հեղափոխական ճանապարհն ընդունելի է բռնապետերին հեռացնելու համար, և որպես օրինակ բերեց Քադաֆիին, Բեն Ալիին, Մուբարաքին։ Ըստ Գիմիշյանի՝ հեղափոխությունը՝ որպես օրինական ճանապարհ իրագործելու ցանկացած ժողովրդի իրավունքը ընդունել են նաև ԱՄՆ-ն, Եվրոպան և Ռուսաստանը:
Հարցին, թե այդ դեպքում ինչպե՞ս կարելի է հասկանալ ՀԱԿ առաջնորդ Լևոն Տեր-Պետրոսյանի հայտարարությունը, թե իշխանությունների հետ խոսելու «այլ լեզուն» հեղափոխությունը կամ ապստամբությունը չէ, Սոս Գիմիշյանը պատասխանեց. «Իհարկե, եթե ամեն ինչ գնաց այնպես, ինչպես որ ցանկալի է, և ինչպես որ պետք է լինի, և իշխանություններըն էլ մի քիչ խելք կունենան ու իրենց ըստ այդմ կպահեն, ապա փոփոխությունների հասնելու ամենացանկալի ճանապարհը սահմանադրականն է, ոչ թե հեղափոխականը: Բայց ո՛չ ժողովուրդը, ո՛չ էլ Կոնգրեսի լուրջ մասը չեն բացառում նաև հեղափոխական ճանապարհը»:
