«Աստանայում ընթացող ԵԱՀԿ գագաթնաժողովի հենց առաջին օրվանից արդեն երևում է, որ այնտեղ չափազանց տխուր մթնոլորտ է»,- լրագրողների հետ հանդիպման ժամանակ կարծիք հայտնեց փորձագետ-քաղաքագետ Մանվել Սարգսյանը:
Սարգսյանի գնահատմամբ՝ հանգամանքը, որ գագաթնաժողովին ներկա չեն ԱՄՆ-ի և Ֆրանսիայի նախագահները, արդեն իսկ խոսում է այն մասին, որ անգամ միջազգային հանրությունը չի հավատում, որ ԵԱՀԿ-ն այն ամբիոնն է, որտեղ հնարավոր է հարցեր լուծել: Մանվել Սարգսյանի կարծիքով, նոր բան Աստանայի գագաթնաժողովում չի լինելու և ևս մեկ անգամ խոսվելու է այն սկզբունքների մասին, որոնք կան, և որոնց մասին ԵԱՀԿ Մինսկի խմբի համանախագահները հայտարարել էին Մուսկոկում:
ՀՔԻ-ի ՀԿ-ի նախագահ, Աստանայում կայացած ԵԱՀԿ երկրների ՀԿ-ների համաժողովի մասնակից Հովհաննես Նիկողոսյանը չհամաձայնեց Մանվել Սարգսյանի այն կարծիքի հետ, թե Աստանայի գագաթնաժողովում տխուր մթնոլորտ է. «Ես չափազանց կարևոր եմ համարում Ռուսաստանի նախագահի ելույթի այն մասը, երբ նա ընդգծեց, թե պետք է հարգվեն ԼՂ կոնֆլիկտի տարածքում ապրող ժողովուրդների իրավունքները»:
Նիկողոսյանը հույս հայտնեց, թե այս գագաթնաժողովը կապացուցի, որ ԵԱՀԿ-ն է հանդիսանում Վանկուվերից-Վլադիվոստոկ ընկած տարածքի անվտանգության երաշխավորը, և որ ինքը ակնկալում է ԼՂ հարցի հետ կապված կոնկրետ քաղաքական հայտարարություններ: