Իմ շրջապատում շատ մեծ են Նարեկ Սարգսյանի նախագծերից դժգոհություն հայտնող մարդիկ: Դա ապացույցի կարիք չունի, որվհետև դա փաստ է: Քրեական գործ չէ, որ ապացույցներ փնտրեն, սակայն նրա աշխատանքների նկատմամբ վերաբերմունքն ակնհայտ է: Մեկնաբանելով Երևանի գլխավոր ճարտարապետ Նարեկ Սարգսյանի երեկվա հայտարարությունն առ այն, որ «իր նախագծերի դեմ բողոքողները մի քանիսն են ընդամենը, իսկ հասարակությունն իրականում վատ վերաբերմունք չունի դրանց նկատմամբ», ասաց ճարտարապետ Արսեն Կարապետյանը:
«Ցանկացած նախագիծ իրավունք ունի որպես առաջարկություն գոյություն ունենալ, բայց մի քիչ անհասկանալի են լուծման մեթոդները: Անհասկանալի է` Հրապարակի հարևանությամբ կառուցվելիք հյուրանոց կառուցելու վերջին նախագիծը որտեղի՞ց հայտնվեց: Այն, ինչ ես տեսել եմ, անձամբ ինձ մոտ շատ հարցեր է առաջացրել մասնագիտական»,- նշեց ճարտարապետը` ընդգծելով, որ Նարեկ Սարգսյանի հայտարարությունը, թե իր դեմ «արշավ» իրականացնողներն առաջնորդվում են անձնական հավակնություններով կամ նախանձից դրդված, չեն համապատասխանում իրականությանը:
Անդրադառնալով Երևանի գլխավոր ճարտարապետի այն հայտարարությանը, թե պարտադիր չէ, որ բոլոր նախագծերը դրվեն հանրային քննարկման՝ Ա.Կարապետյանն ասաց, որ խնդիրներ կան, որոնք վերաբերում են քաղաքի ճակատագրին, ու պետք է հասարակությանը թույլատրվի մասնակցել կարևոր որոշումների քննարկմանը: «Զուտ նախագծային խնդիրները, բնական է, հասարակությունը չպետք է լուծի, պետք է լուծեն մասնագետները, բայց կառուցել, թե չկառուցել՝ պետք է որոշի հասարակությունը»,- հավելեց նա:
