Քաղաքական անորոշությունը պահպանվեց: Այսօր «Առաջին լրատվականի» հետ զրույցում նման կարծիք հայտնեց Քաղաքագետների միության նախագահ, քաղաքագետ Հմայակ Հովհաննիսյանը` մեկնաբանելով, որ մարդիկ սպասում էին պատասխանի, թե արդյոք երկխոսությունն ավարտվե՞լ է, թե՞ սկսվել է քաղաքական նոր զարգացումների փուլ:
«Եթե երկխոսությունը իր մեջ բազում հարցականներ էր պարունակում, իսկ առկախումը այս հարցականների թիվը չի քչացնում, այլ բազմապատկում է, ուստի ես չեմ կարծում, որ մարդիկ գոհ են հեռացել ՀԱԿ-ի հանրահավաքից, քանի որ անորոշությունը պահպանվեց, բայց մարդիկ եկել էին ակնկալիքով, որ ստանան վերջնական պատասխան»,- մեկնաբանեց Հ. Հովհաննիսյանը:
Նա նաև նշեց, որ հանրահավաքը մարդաշատ էր նախորդի համեմատ` վերլուծելով, որ մարդկանց դժգոհությունն ավելացել է: «Հասկանալի է, թե ինչու էր մարդաշատ. սոցիալական դժգոհությունը ամիսների ընթացքում անընդհատ աճել է, խորացել, չնայած «Հայլուր» լրատվականի լավատեսական ռեպորտաժներին: Ուստի ես դրանով եմ պայմանավորում հանրահավաքում մեր քաղաքացիների ակտիվ մասնակցությունը, թե որքանով են նրանք բավարարված հանրահավաքի արդյունքներից, այն հանգամանքից, որ առկախված երկխոսության իրավիճակը շարունակվում է իր ամբողջ երկիմաստությամբ պահպանվել, թե որքանով է դա գոհացուցիչ՝ պետք է ասեն հենց իրենք քաղաքացիները»,- ասաց քաղաքագետը` հավաստիացնելով, որ դեռևս չի հանդիպել մի մարդու, որ ասի, թե գոհ է երկխոսության առկախումից: «Ես կասեի, որ երկխոսությունից միշտ դժգոհ են եղել և կասկածանքով են վերաբերվել, բայց կրկնակի դժգոհ են այս առկախումից:
Հմայակ Հովհաննիսյանը երկխոսությունը համարում է մեռյալ գաղափար, որովհետև սեղանի շուրջ նստելուց առաջ պետք է կողմերը ճշգրտեին օրակարգը: «Եթե օրակարգը ճշգտված չէ, եթե կողմերը չեն գալիս ընդհանուր հայտարարի օրակարգի վերաբերյալ, կնշանակի այդ բանակցությունները ձախողված են ի սկզբանե: Քանի որ հենց այդպես էլ եղել է, ես բոլոր հիմքերն ունեմ արձանագրելու, որ այդ երկխոսությունը մեռյալ գաղափար էր»,- իր կարծիքը հայտնեց երկխոսության վերաբերյալ` հավելելով, որ երկխոսելը ենթադրում է առարկայի ճշգրտում և կողմերի ընդհանուր հայտարարի գալ: