Այսօր ԱԺ «Ժառանգություն» խմբակցության պատգամավոր Ստյոպա Սաֆարյանը արթնացել է քնից և արձանագրել որ իշխանությունները դեռ չեն հեռացել: Այս մասին այսօր հրավիրված ասուլիսի ընթացքում, անդրադառնալով ՀԱԿ-ի երեկվա հանրահավաքում նշանակված 24-ժամյա վերջնաժամկետին, ասաց Ստյոպա Սաֆարյանը: Իսկ այն դիտարկմանը, թե կցանկանա՞ր, որ հեռանային՝ ավելացրեց. «Ես դա չեմ թաքցնում, բայց ինձ համար ոչ միայն հեռանալն է կարևոր, այլև թե նրանցից հետո ով է գալու»:
Սաֆարյանը անցյալից ներկա գալով՝ եկավ այն եզրահանգման, որ բոլորն էլ նույն թիմի անդամներ են և ղարաբաղյան հարցում նույն գիծն են առաջ տանում, և նրանցից ոչ ոք թե՛ ներքին, թե՛ արտաքին ճակատում արմատական փոփոխությունների չի հասնելու:
Անդրադառնալով Լևոն Տեր-Պետրոսյանի ելույթին՝ Սաֆարյանը նկատեց, որ լսելով Տեր-Պետրոսյանի ելույթը՝ իր մոտ տպավորություն է ստեղծվել, որ նա «կանգ է առել 2008 թվականի վրա» և դասախոսություններ է կարդում: Նրա խոսքերով՝ ավելին, WikiLeaks-ի բացահայտումից հետո Լևոն Տեր- Պետրոսյանը չի էլ ձգտում հեղափոխության, քանի որ WikiLeaks-ը բացահայտել էր՝ թե՛ նախագահական, թե՛ ավագանու ընտրություններում նրա նպատակը ոչ թե հաղթելն էր, այլ հետընտրական սրացումներ ստեղծելը:
Ինչ վերաբերում է կադրային վերջին փոփոխություններին իշխանության ճակատում՝ Սաֆարյանը դա պայմանավորում է WikiLeaks-ով՝ նկատելով, որ WikiLeaks-ը ցանկանում է ասել, որ Սերժ Սարգսյանը օլիգարխիկ տնտեսությունից ազատվելու խոստումներ է տվել, բայց չի իրականացրել, հետևաբար Սերժ Սարգսյանը ցանկանում է ցույց տալ, որ հավատարիմ է իր խոստումներին, և այդ խոստումները ընթացքի մեջ են:
Ընդհանուր առմամբ, Սաֆարյանը համոզված է, որ WikiLeaks-ը իր հրապարակումներով Հայաստանի երեք նախագահներին էլ թոշակի է ուղարկելու:
Ինչ վերաբերում է այն վարկածին, որ Կարեն Կարապետյանը հրաժարական է տվել վարչապետ նշանակվելու համար՝ Սաֆարյանը նշեց, որ այդ խոսակցությունները վաղուց կային, միաժամանակ կային խոսակցություններ, որ նրա հետ անհամաձայնություններ կային աշխատակազմում երիտասարդ թևի հետ, ինչպես նաև խոսվում էր Գագիկ Բեգլարյանի հետ կապված միջադեպի վարկածի մասին, սակայն՝ թե այդ վարկածներից ո՞րն է ճիշտ, չի կարող ասել: Իսկ ինչ վերաբերում է ղարաբաղյան հիմնախնդրի լուծմանը՝ նա երկար վերլուծություններից հետո եկավ այն համոզման, որ պետք է սկսել նոր կետից:
