Արցախում ձևավորված «Միջանցքի ապաշրջափակման ժողովրդական շարժման» շտաբն այսօր երթ իրականացրեց դեպի Լաչինի միջանցք։ Այսօր նախաձեռնող խումբը կոչ էր արել հավաքվել և քննարկել հետագա անելիքներն ու վճռել արցախցու ապագան։
«Միջանցքի ապաշրջափակման ժողովրդական շարժման» շտաբ նախաձեռնող խմբի անդամ Դավիթ Վանյանը «Առաջին լրատվական»-ի հետ զրույցում նշեց, որ իրենց նապատակը մեկն է՝ ապաշրջափակել Արցախի կյանքի ճանապարհը:
«Սկզբում շատ էչինք, հետո Ստեփանակերտի կենտրոնական փողոցներով շրջեցինք, կոչ արեցինք միանալ և բավական թվով մարդիկ միացան: Որոշեցինք գնալ և պահանջներով ու կոչերով առաջին հերթին դիմել մեր իշխանություններին, որ հասկանանք, թե ինչ քայլեր ենք նախաձեռնելու: Նախագահը և պետնախարարը մեր խմբից մոտ 10 հոգու ընդունեցին: Նրանք ասացին, որ այս շարժմանը պետք է իրականում բոլորը միանան: Սպասենք մինչև հուլիսի 15-ը, այդ օրը պետք է հանդիպում տեղի ունենա: Եթե ամսի 15-ին էլ ճանապարհը չբացեն, ապա բոլորս պետք է ձեռք ձեռքի տանք, դուրս գանք և մեր բողոքը լսելի դարձնենք»,-ասաց նա:
Դիտարկմանը, որ փաստորեն Արցախի իշխանությունը ևս միանում է շարժմանը, Վանյանն արձագանքեց. «Չենք ուզում այդ կոնտեքստում ասել՝ միանալու են մեզ, բայց այդպես է ստացվում: Սա մեր քաղաքացիների փոքր հաղթանակն է, որ իշխանությունը լսել է մեզ և պատրաստ է իր ռեսուրսներով մեր պահանջները աշխարհին լսելի դարձնել»:
