Այսօր «Տեսակետ» մամուլի ակումբում տեղի ունեցած մամուլի ասուլիսի ժամանակ Վիկ Դարչինյանը ևս մեկ անգամ շեշտեց, որ իրականացավ իր նպատակը` նա մենամարտ անցկացրեց հայրենիքում:
«Ես IBO ֆեդերացիային խնդրել էի, որ լավ հակառակորդ տրամադրեն, և նրանք Մբամբային էին առաջարկել, ով ընդամենը մեկ պարտություն ուներ: Ես շատ լավ էի պատրաստվել և հաղթեցի: Կարծում եմ՝ ավելի լավ եղավ, որ 12 ռաունդ տևեց մարտը. Մարդկանց հետաքրքիր չէր լինի եթե 2-3 ռաունդ հետո նրան նոկաուտ անեի, ու մարտն ավարտվեր»:
Ըստ Վիկի՝ Հայաստանում կայացած այս մենամարտը կնպաստի հետագայում այլ մրցաշարեր անցկացնելուն. «Աշխարհի տարբեր ֆեդերացիաներից հյուրեր կային, և բոլորը փաստել են, որ ամեն ինչ անցավ բարձր մակարդակով»:
Անդրադառնալով չեմպիոնական գոտին Սերժ Սարգսյանին նվիրելու հետ կապված քննադատությանը` Վիկը նշեց, որ դա անակնկալ էր, և ոչ ոք չգիտեր դրա մասին: Ըստ Դարչինյանի՝ նա այդպիսով իր շնորհակալությունը հայտնեց Սերժ Սարգսյանին, ում ներկա գտնվելը մարտին երաշխիք է հանդիսացել միջազգային ֆեդերացիաների համար:
«Ես իմ տիտղոսը չեմ նվիրել նախագահին, գոտին եմ նվիրել»,- ասաց Դարչինյանը:
Մարզիկն անդրադարձավ նաև հովանավորների հետ կապված՝ մամուլում տեղ գտած քննադատությանը։ «Հովանավորները շատ են օգնել, բայց ես իմ գրպանից շատ ավելի շատ գումար եմ ծախսել: Ես կարող էի ԱՄՆ-ում անցկացնել այս մարտը և ոչ միայն գումար չծախսել, այլև` գումար վաստակել»,- ասաց աշխարհահռչակ հայ բռնցքամարտիկը: