Ինչպես հաղորդում է բրիտանական BBC-ն, այսօր առավոտյան Թեհրանի Էվին բանտում կախաղան է հանվել Շահլա Ջահեդ անունով մի կին: Միջազգային կազմակերպությունները պայքարում էին նրա կյանքի համար այն օրվանից, երբ 9 տարի առաջ բանտարկվել էր: BBC-ն հայտնում է նաև, որ սա 146-րդ մահապատիժն է Իրանում: Amnesty International-ը երեկ վերջին անգամ հանդես էր եկել հայտարարությամբ` հայտնելով, որ Ջահեդի նկատմամբ դատավճիռն արդար չի եղել: Մալքոլմ Սմարթը, որը Amnesty International-ի Մերձավոր Արևելքի և Հյուսիսային Աֆրիկայի պատասխանատուն է, հայտարարել է, որ իրենք «լուրջ հիմքեր ունեն՝ կարծելու, որ Շահլայի նկատմամբ չի իրականացվել ազնիվ դատավարություն, և որ իր իսկ դեմ ցուցմունքները կորզվել են նրա` մենախցում վերջին ամիսներին նրա գտնվելու ժամանակ»: Ջահեդը մեղադրվում է նրանում, որ ժամանակավոր ամուսնության կարգավիճակ ունենալով իրանցի հայտնի ֆուտբոլիստ Նասեր Մոհամադ-խանի հետ (այս կարգավիճակն թույլատրելի է շարիաթով), սպանել է նրա առաջին կնոջը: Նա դատապարտվել էր 2002 թ.: Սկզբում Շահլա Ջահեդն ընդունել էր մեղքը, ապա դատարանում հրաժարվել էր իր ցուցմունքներից: 2008 թ. դատարանը դադարեցրել էր մահապատժի գործընթացը` հղում անելով դատավարական խախտումների առկայությանը նրա գործում, սակայն Ջահեդը 2009 թ. կրկին դատապարտվել էր մահապատժի:
