Այսօր ՀՖՖ գրասենյակում տեղի ունեցած մամուլի ասուլիսի ժամանակ Անդորրայից և Սլովակիայից հաղթանակներով վերադարձած Հայաստանի հավաքականի գլխավոր մարզիչ Վարդան Մինասյանը նախապես խնդրեց հարցեր չտալ Իռլանդիայի հավաքականի հետ սպսվելիք խաղից և անմիջապես անցավ լրագրողների հարցերին պատասխանելուն:
Ովքե՞ր են «Եվրո-2012»-ի ընտրական փուլի B խմբի ֆավորիտները հարցին Մինասյանը պատասխանեց. «Մեր խմբում 4 ֆավորիտ կա»:
Անդրադառնալով Մակեդոնիայի հետ կայանալիք հանդիպմանը` Մինասյանն ասաց, որ մակեդոնացիների զբաղեցրած տեղը չի համապատասխանում նրանց ցուցադրած խաղին:
«Իմ տեսած հանդիպումներից ոչ մեկում Մակեդոնիայի հավաքականը խաղով չի պարտվել մրցակիցներին, և նրանց զբաղեցրած տեղը չի համապատասխանում իրենց ցուցադրած խաղին: Հեշտ չի լինելու: Հեշտ չէր անգամ Անդորրայի հետ»,- ասաց Մինասյանը:
Խոսելով Հայաստանի հավաքականի պոտենցիալից` Մինասյանը հայտարարեց, որ հավաքականում սերնդափոխությունը կատարվել է: Նա նշեց նաև, որ մեր հավաքականում 4 գոլ խփող ֆուտբոլիստ կա. «Եթե թիմը 2 գոլ խփող ֆուտբոլիստ է ունենում, գոհ է լինում: Վիճակագրությանը նայելով՝ կտեսնենք, որ մենք 4 գոլ խփող ֆուտբոլիստ ունենք»:
Մինասյանը հրաժարվեց գնահատել ՀՖՖ նախագահի 3 մլն եվրո դրամական պարգևատրության խոստումը:
