Սոչիում այսօր տեղի կունենա Փաշինյան-Պուտին հանդիպում, հայտնել է Կրեմլի խոսնակ Պեսկովը: Ինչպես հայտնի է, Հայաստանի վարչապետը Սոչի էր մեկնել ԵՏՄ վարչապետների խորհրդի նիստին մասնակցելու համար: Սակայն, ըստ ամենայնի Փաշինյան-Պուտին հանդիպումը պլանավորված է, քանի որ Հայաստանի վարչապետ Նիկոլ Փաշինյանը մայիսի սկզբին Պրահա կատարած այցի ընթացքում հայկական համայնքի հետ հանդիպմանը անդրադառնալով Պուտինի հետ հարաբերության թեմային, նշել էր նաև, որ առաջիկա ամսում երկու անգամ հանդիպելու է նրան: Առաջինն ինչպես հայտնի է մայիսի 25-ին էր, Մոսկվայում ԵԱՏՄ առաջնորդների հանդիպմանը, որի շրջանակում տեղի ունեցավ նաև եռակկողմ Պուտին-Փաշինյան-Ալիև հանդիպում: Հունիսի 9-ին տեղի ունենալիք հանդիպումից առաջ Մոսկվայում կայացավ մայիսի 25-ի հանդիպմանը համաձայնեցված հանդիպումը փոխվարչապետների աշխատանքային խմբի մակարդակով, որի օրակարգում հաղորդուղիների ապաշրջափակումն էր:
Չի բացառվում, որ Սոչիում Փաշինյան-Պուտին հանդիպման քննարկման հիմնական թեման կլինի հենց հաղորդուղիների ապաշրջափակման օրակարգը: Նաև, հնարավոր է, որ Փաշինյան-Պուտին հանդիպումից հետո, որևէ ձևաչափով կլինի Պուտին-Ալիև շփում: Համենայն դեպս, ըստ մոսկովյան եռակողմ հանդիպման, փոխվարչապետների մակարդակով հանդիպումից հետո երկրների ղեկավարներին պետք է ներկայացվեր աշխատանքի եզրակացություն, որից հետո պարզ կլիներ՝ կա՞ նրանց նոր հանդիպման անհրաժեշտություն, թե ոչ: Իսկ մինչ այդ, հայտարարվեց Վաշինգտոնում նախատեսված Միրզոյան-Բայրամով հանդիպումը, որ պետք է տեղի ունենար հաջորդ շաբաթ: Հայկական կողմը նշեց, թե հետաձգումը եղել է Ադրբեջանի խնդրանքով, իսկ ԱՄՆ պետքարտուղարությունը նշել է, որ նոր հանդիպման ժամկետներն անորոշ են:
Գործնականում, հայ-ադրբեջանական խնդրի և Կովկասի շուրջ աշխուժացած բավականին ինտենսիվ դիվանագիտական մրցակցությունը շարունակվում է, որտեղ թերևս մի առանցքային նոր շերտի մասին է խոսում այն, որ Միացյալ Նահանգները Հայաստանն ու Վրաստանը դիտարկել է Ռուսաստանին՝ պատժամիջոցները շրջանցելու հարցում օժանդակող հինգ երկրների շարքում: Զուգահեռ, ինչպես անդրադարձել էի նախօրեին, Հայաստանում նշմարվում է ամերիկա-ռուսական մրցակցության աշխուժացման միտում միջուկային էներգետիկայի բնագավառում, ու դա այն տեղեկության ֆոնին, որ ԱՄՆ նախագահ Ջո Բայդենը և Բրիտանիայի վարչապետ Սունակը Վաշինգտոնում ստորագրել են միջուկային էներգետիկայում դաշնակցության մասին հռչակագիր, որի նպատակն է Ռուսաստանին դուրս մղել այդ շուկայում առաջատարների շարքերից:
