Հայաստանի անվտանգության խորհրդի քարտուղարն այսօր աշխատանքային մեկնել է Բելառուս, որտեղ մասնակցելու է ՀԱՊԿ-ի Անվտանգության խորհուրդների քարտուղարների կոմիտեի հերթական նիստին։ Օրերս Հանրային հեռուստաընկերության եթերում Գրիգորյանը չէր բացառել, որ Մինսկում հնարավոր է ռուս գործընկերոջ հետ քննարկի նաև Երևանի պատվիրած միլիոնավոր դոլարների զենքի ճակատագիրը։ «Մենք կքննարկենք երկկողմ հարաբերությունների հարցեր։ Հաշվի առնելով այն իրականությունը, որ գոյություն ունի, այսինքն՝ Ռուսաստան-Ուկրաինա պատերազմ, Ռուսաստանի կարողությունները սպասարկելու իր այդ պատերազմը և նաև հաշվի առնելով, որ կարողությունն այնքան էլ մեծ չի որպեսզի արտահանում էլ տեղի ունենա, մենք գնացել ենք նաև այլ ռեսուրսներ որոնելու ճանապարհով»,-ասել է Գրիգորյանը։ Միևնույն ժամանակ անվտանգության քարտուղարն ասել էր, որ կան բազմաթիվ երկրներ, որոնց հետ Հայաստանը ինտենսիվ քննարկումներ է ունենում զենք գնելու հարցով։
Մարտական եղբայրության անդամ Հովսեփ Ղազարյանը կարծում է՝ ռուս-ուկրաինական խորացող պատերազմի ֆոնին Ռուսաստանը չի կարողանա Հայաստանին զենք մատակարարել․հնարավոր է այլ հարց լուծվի՝ թող վերադարձնեն գումարը․ Նրա խոսքով՝ մեր ամենամեծ սխալն այն էր, որ նույնիսկ 44-օրյա պատերազմից առաջ չենք ունեցել այլընտրանքներ։ Հայաստանի կողմից ամենաճիշտ մոտեցումը կլիներ սեփական արտադրական կարողությունների զարգացումը։ Ռուսաստանը 44-օրյա պատերազմից ի վեր Հայաստանին զենք չի մատակարարել։ Նախորդ տարի սեպտեմբերին վարչապետ Նիկոլ Փաշինյանը հայտարարեց, որ մենք դեպքեր ունենք, երբ որ հարյուր միլիոնավոր դոլարներ վճարված են, բայց Հայաստանի նկատմամբ մատակարարումների պարտավորությունները չեն կատարվում՝ այդ թվում դաշնակից երկրների կողմից։
