Արցախի պաշտպանության բանակը հաղորդել է , որ հունիսի 6-ին, ժամը 11:00- 17:30-ի սահմաններում Ադրբեջանի ԶՈւ-ն շփման գծի կենտրոնական, արևելյան և հարավ-արևելյան ուղղութուններում խախտել է հրադադարը` կիրառելով հրաձգային զինատեսակներ։ Ըստ հաղորդագրության, հայկական կողմը կորուստներ չունի։
Հրադադարի խախտումների մասին, Պաշտպանության բանակի փոխանցմամբ, հաղորդվել է ՌԴ խաղաղապահ զորակազմի հրամանատարությանը։
Ադրբեջանի ռազմական գերատեսչությունն ավելի վաղ Արցախի պաշտպանության բանակին մեղադրել էր շփման գծի մի շարք հատվածներում ամրաշինական աշխատանքներ իրականացնելու համար։ Ստեփանակերտից հերքել են այս հայտարարությունները։
«Հելսինկյան նախաձեռնություն-92» Լեռնային Ղարաբաղի կոմիտեի համակարգող, խաղաղության և մարդու իրավունքների միջազգային մրցանակների դափնեկիր Կարեն Օհանջանյանը կարծում է, որ Ադրբեջանն ուժի գործադրման ճանապարհով ճնշում է գործադրում Հայաստանի վրա՝ իր պահանջները կատարելու համար.«Ակնհայտ է, որ Ադրբեջանը կամաց-կամաց գնում է այն ուղղությամբ, որ ուժի գործադրումով իրեն ենթարկեցնի Լեռնային Ղարաբաղի Հանրապետությունը։ Սրան նախորդել են մի շարք սադրանքներ, վերջինն էլ՝ անցակետի տեղադրումն էր Լաչինի միջանցքում։ Ուժային մեթոդի գործադրումն ունի միայն մեկ նպատակ՝ ստիպել Հայաստանին ենթարկվել Ադրբեջանին և դրանով Հայաստանը Լեռնային Ղարաբաղին համոզի, որ չկա այլընտրանք, քան Ադրբեջանի Հանրապետության կազմում լինելը»։
Արցախում հրադադրի խախտման հերթական ֆոնին Արդբեջանի արտգործնախարար Ջեյհուն Բայրամովը հայտարարում է՝ Ադրբեջանն ու Հայաստանը խաղաղության շեմին են։ Ջեյհուն Բայրամովն այս մասին խոսել է՝ ելույթ ունենալով Եվրոպայում անվտանգության և համագործակցության կազմակերպության մշտական խորհրդի արտահերթ նիստում:
Բայրամովն ասել է, թե Ադրբեջանը ակտիվորեն աշխատում է Հայաստանի հետ կայուն խաղաղություն ապահովելու համար։Նրա խոսքով՝ վերջին մի քանի շաբաթների ընթացքում Վաշինգտոնում, Բրյուսելում, Մոսկվայում և Քիշնևում կայացած բանակցությունները «հնարավորություն են տվել ավելի լավ հասկանալ կողմերի դիրքորոշումները»։
Բաքուն սպասում է, որ Երևանը քաղաքական կամք դրսևորի՝ լուծելու տարաձայնությունները երեք ուղղություննրով, որոնք ձևավորում են խաղաղության պայմանագրի շուրջ երկկողմ քննարկումների օրակարգը, ասել է նա:
Այս համատեքստում Ադրբեջանի արտգործնախարարը նշել է, որ երկու երկրների միջև հարաբերությունների կարգավորման բանակցություններում հիմնական խոչընդոտներն են «Ադրբեջանի ինքնիշխան տարածքներում Հայաստանի անօրինական ռազմական ներկայության շարունակումը», «Ադրբեջանի ներքին գործերին Երևանի միջամտությունը», «Բաքվի և Ղարաբաղի տարածաշրջանի տեղի հայ բնակչության միջև երկխոսության խոչընդոտումը»։
Կարեն Օհանջանյանը հարց է բարձրացնում՝ իսկ ինչ նկատի ունի նա, երբ ասում է ադրբեջանական տարածքներ.«Այն հայկական անկլավները, որ այժմ գտնվում են Ադրբեջանի տարածքում, նորից ադրբեջանական տարածքնե՞ր են»։
Իրավապաշտպանը համարում է, որ Բայրամովն անթաքույց սադրանքների է դիմում, իսկ միակ նպատակը՝ արցախահայությանը հնարավորինս ճնշելն է։
Կարեն Օհանջանյանի խոսքերով՝ սա ոչ այլ ինչ է քան Հայաստանին Արցախի հարցում կապիտուլյացիա պարտադրելու փորձ, ինչը կարող է հանգեցնել նրան, որ Արցախի ժողովուրդը թշնամաբար կտրամադրվի Հայաստանի դեմ.«Հայաստանից պահանջվում է տոտալ կապիտուլյացիա, ընդ որում այնպես, որ Հայաստանն անգամ չպետք է բարոյական աջակցություն ցույց տա Լեռնային Ղարաբաղի հայերին։ Եթե Հայաստանը գնա այդպիսի քայլերի, ապա չի բացառվում, որ Լեռնային Ղարաբաղում Հայաստանն ու Հայաստանի ղեկավարությունը դիտարկեն որպես թշնամի երկիր։ Չեմ ուզում հասնենք առճակատման այն աստիճանին, որ Լեռնային Ղարաբաղի ժողովուրդն ատի հայությանը»։
