Հայաստանի արտգործնախարարը հեռախոսազրույց է ունեցել ԱՄՆ պետքարտուղարի Եվրոպայի ու Եվրասիայի հարցերի տեղակալի պաշտոնակատար Դերեք Հոգանի հետ, քննարկելով հայ-ադրբեջանական խաղաղության պայմանագրի նախագծին առնչվող հարցեր՝ Վաշինգտոնում հունիսի վերջին սպասվող արտգործնախարարական հանդիպմանն ընդառաջ: Պաշտոնական հաղորդագրության մեջ նշվում է, որ Հայաստանի արտգործնախարարը ընդգծել է սահմանազատման եւ սահմանագծման աշխատաքը 1975 թվականի քարտեզների հիմքով իրականացնելու հանձնառության կարեւորությունը: Արարատ Միրզոյանի այդ շեշտադրման պատճառը Ադրբեջանի ԱԳՆ տարածած հայտարարությունն է, որով Բաքուն հայտարարում էր, թե չունի ոչ մի քարտեզի շուրջ պայմանավորվածություն եւ ընդհանրապես դեմ է որեւէ քարտեզով սահմանազատմանն ու սահմանագծմանը, այլ համարում է, որ դա պետք է արվի միջազգային իրավական փաստաթղթերի հիմքով:
Այլ կերպ ասած, Ադրբեջանը փաստացի դնում է հնարավորինս տարածական դաշտի խնդիր, որտեղ նա կարող է առավել մեծ հնարավորություն ստանալ ուժի գործոնի միջոցով պայմաններ թելադրելու փորձի համար: Եթե դիտարկվում է սահմանազատման եւ սահմանագծման կոնկրետ հիմք, Ադրբեջանի այդ հնարավորությունը նկատելիորեն սահմանափակվում է: Իսկ խնդիրը փաստացի առնչվում է մեկ այլ հիմնարար հարցի՝ տարածքային ամբողջության ճանաչմանը: Այլ կերպ ասած, Ադրբեջանի դիրքորոշումը գործնականում խոսում է այն մասին, որ Բաքուն կոշտացնում է իր պայմանները: Եվ սա այն պարագայում, երբ մայիսին վաշինգտոնյան հանդիպումից հետո ամերիկյան կողմը հայտարարեց, որ Հայաստանին ու Ադրբեջանին առաջարկներ են ներկայացրել այն հարցերի առնչությամբ, որոնց շուրջ չկա համաձայնություն:
Իսկ սահմանազատման եւ տարածքային ամբողջության ճանաչման հարցը դրանցից մեկն էր: Փաստացի ստացվում է, որ Ադրբեջանը կոշտացնում է իր դիրքորոշումը, կամ՝ ըստ Երեւանի, հրաժարվում 1975 թվականի քարտեզի շուրջ աշխատանքը կառուցելու հանձնառությունից: Տրամաբանությունը հուշում է, որ այդ պարագայում պետք է զանգ լիներ ոչ թե Երեւան, այլ Բաքու, հարցնելու, թե ինչու՞ է Ադրբեջանը հրաժարվում եւ կոշտացնում դիրքորոշումը: Եթե իհարկե Միրզոյան-Հոգան հեռախոսազրույցի նախաձեռնողը հայկական կողմը չէ՝ Վաշինգտոնից պարզելու, թե ինչու՞ է Բաքուն հրաժարվում հանձնառությունից:
