Հայաստանի Հանրապետության վարչապետ Նիկոլ Փաշինյանը որոշում է ստորագրել միջգերատեսչական աշխատանքային խումբ ստեղծելու և դրա կազմը հաստատելու մասին: «Հիմք ընդունելով «Կառավարության կառուցվածքի և գործունեության մասին» Հայաստանի Հանրապետության օրենքի 7-րդ հոդվածի 5-րդ մասը և Հայաստանի Հանրապետության Կառավարության 2021 թվականի փետրվարի 25-ի N 252-Լ որոշման հավելվածի 130-րդ կետը`
1. Հայաստանի Հանրապետությունում նոր միջուկային էներգաբլոկ կառուցելու, փոքր մոդուլյար ռեակտորներ տեղակայելու նպատակահարմարության, ինչպես նաև անհրաժեշտ տեխնոլոգիաների ընտրության նպատակով վերլուծություններ իրականացնելու և հետագա քայլերի հաջորդականությունը սահմանելու վերաբերյալ հարցերի քննարկման նպատակով ստեղծել միջգերատեսչական աշխատանքային խումբ և հաստատել դրա կազմը` համաձայն հավելվածի:
2. Միջգերատեսչական աշխատանքային խմբի ղեկավարին՝ երկամսյա ժամկետում Հայաստանի Հանրապետության վարչապետի աշխատակազմ ներկայացնել տեղեկատվություն՝ աշխատանքային խմբի կատարած աշխատանքների մասին»,- նշված է որոշման մեջ: Թեմայի շուրջ «Առաջին լրատվական»-ը զրուցել է Էներգետիկ անվտանգության փորձագետ Արթուր Ավետիսյանի հետ:
Ավետիսյանի խոսքով` շփոքր մոդուլային ռեակտորները մեզ ոչ ֆինանսական, ոչ քաղաքական առումով ձեռնտու չեն. «Եթե դիտարկում ենք, որ ՀՀ-ն չվերադառնա 90-ականների մութ ու ցուրտ տարիները, ձեռնտու են փոքր մոդուլային ռեակտորները»:
Ավետիսյանը նաև նշեց` Ատոմակայանը դա քաղաքականություն է. քաղաքական որոշում կայացնելիս ներդրումը խոչընդոտ չէ. «Եթե Հայաստանը փորձում է դառնալ իրական խաղացող, չի կարելի էներգետիկ ոլորտում նվազագույն ծախսերով հիմնավորել ներդրումը: Էներգետիկ անկախություն ապահովելու համար նախ պետք է ունենալ էներգետիկ անվտանգություն: Մոդուլային ռեակտորների կառուցման համար Մեծամորի տարածքը ափսոս է, պետք է ընտրել այլ տարածք: Մեծամորում պետք է կառուցել հզոր կայան, մոդուլային ռեակտորների համար ափսոս է»:
